Ignatius Nambundunga
WINDHOEK – Momahogololo goshiwike sha zi ko omwa li onkalo yaNankali kohi Nangombe kombanda miikandjohogololo oyindji moshilongo, moka oongundu dhopapolitika dha li tadhi ningi shanamutango okulela iitopolwa osho wo oondoolopa.
Nonando iizemo ya kala ya yooloka mpano naampeya, ongundu tayi pangele yoSwapo oya li ye shi pondola okuyangata po iikandjohogololo ayihe 46 miitopolwa yomonooli, nokwa tegelelwa aawulikwakansela yawo ya ka lele iikandjo mbyoka uule woomvula ntano twa thinda.
Miitopolwa Omusati, Oshana, Oshikoto nOhangwena, ongundu tayi pangele oye shi pondola wo okusindana po omahogololo gomalelo goondoolopa.
Miitopolwahogololo yokonooli, Swapo ota tsikile okulela omalelo goondoolopa omanene, ngaashi Oshakati, Oshikuku, Outapi, Ongwediva, Helao Nafidi, Eenhana, Omuthiya nagalwe.
Onandjaba, ndjoka yi li moshitopolwahogololo shaMusati, moka mwa li mwa ningwa omahogololo gomalelo goondoolopa oshikando shotango, Swapo okwe yi yangata po wo niipundi ine yomwiitano.
Nonando iizemo ya endele nawa ongundu tayi pangele, olopota ya za kokomisi yomahololo – Electoral Commission of Namibia (ECN) oya ulike kutya omwaalu gwaahogololi ogwa li gu li pohi noonkondo.
Aantu 752 435 oya li ya ishangitha ya kuthe ombinga momahogololo ngaka, ashike aantu ashike ye li 272 942 ye shi pondola okuhogolola, sha ikwatelele komiyalu dhokomisi yomahogololo moshilongo.
LPM, IPC ya kuluka
Ongundu yoIndependent Patriot for Change (IPC), ndjoka ya li tayi endelele momahogololo goshikako sha za ko gomalelo goondoolopa niitopolwa, oya mono omawi gawo ga shuna pevi.
IPC okwa mono mo ashike oopelesenda 15,1 momahogololo gonuumvo, okuyelekanitha noopelesanda 21,20 momahogololo go2022.
IPC haye ashike a mono ekuluko lyomawi, moshimpungu moka okwa li a mono mo mbushe, ano ongundu yoLandless People’s Movement (LPM), ndjoka unene ya kala nokutyakaleka muumbugantu woshilongo, nayo wo tayi ende tayi shongola.
LPM okwa li ashike a mono mo oopelesenda 5,58, okuyelekanitha noopelesenda 14,21 ndhoka a monene mo2022.
Popular Democratic Movement (PDM), ndjoka ya sindana po oshikandjohogololo shaKakarara oshikando shotango muule woomvula dha konda omu-15, nayo wo iizemo yomoshilongo inayi yi enditha nawa, ya mono mo ashike oopelesenda 5,24.
AR naawulikwahogololo ya ithikamena ya ikolomona
Ongundu yoAffirmative Repositioning (AR), ndjoka ya kutha ombinga momahogololo gomalelo goondoolopa ga yooloka oya li ya sindana iipundi momalelo goondoolopa ngaashi mOkahao, Oshikuku, Outapi, Oshakati, Nkurenkuru, Ondangwa, Tsumeb osho womoshilandopangelo Windhoek.
Moshitopolwahogololo shaKavango East, moshikandjohogololo shaRundu Rural, Paulus Mbangu ngoka e li omuulikwahogololo a ithikamena okwa li a sindana omahogololo guukansela, moka a li a dhenge mo oongundu oonene ngaashi oSwapo no-IPC.
Mbangu oye a li kansela nota shuna koshipundi. Moshitopolwahogolo shaHardap, moshikandjohogololo shaRehoboth West Urban, omuulikwahogololo a ithikamena Harold Kambrude oye sindana.
Kambrude okwa li a dhenge mo ongundu ye onkulu yo-LPM, osho woAmalia Beukes gwoSwapo.
Shi li kEwale osho tuu shi li kOnkumbi, moshitopolwahogololo shaZambezi, moshikandjohogololo Kongola, omuulikwahogololo a ithikamena Bannety Basihu okwa li a dhenge mo omuulikwahogololwa gwoSwapo Ace Mutelo neyooloko lyomawi 38.
Busihu okwa li a mono omawi ge li 1 270, naMutelo okwa li a mono mo 1 232.