Victoria Immanuel
Auleria Wakudumo
Opolisi moshitopolwa shaHangwena oya patulula oshipotha shedhipago, moka okanona kokamati koomvula 12 anuwa ka tsu nokudhipaga mumwayinamati gwomimvo 18 nombele.
Oshiningwanima shika oshi li oshititatu shomiiningwanima yomadhipago ya ningwa mOhangwena –muule womasiku gatano – moka aanegumbo yi ipilukila po nokudhipagathana.
Shika osha gwedha iiningwanima iyali, shimwe shomuyo oshomukiintu gwomimvo 24 anuwa a dhipaga omumwayinamati, naashoka shomulumentu gwomimvo 26, anuwa a dhipaga yinakulu gwomimvo 88.
Oshiningwanima shika sha kwatela mo okanona komimvo 12, osha ningwa Etiyali lwopotundi 20h00, momukunda Ondobe Yomunghudi.
Omupopiliko gwopolisi yaHangwena, Warrant Andreas Nghiyolwa okwa holola kutya oontamanana odha tukuka pokati kokanona hoka nomumwayinamati pethimbo okanona ka li taka kambadhala okugamena yina ngoka a li ta nyenyeta naangoka a ningi oshihakanwa. Oshoka anuwa osha eta okanona ka tse mumwayina nombele montulo.
Opolisi oya ti otayi tsikile okuninga omapekapeko ga gwedhwa po moshiningwanima shika.
Omupopepi gumwe naakwanezimo okwa hokololele Kundana kutya nakuningwa oshihakanwa oye enda taya nyenyeta nayina okuza kuundingosho sigo omegumbo molwehalasa lyotombo. Anuwa yina okwa nwa po otombo yomwana. Oontamanana ndhoka anuwa kadha li dha nyanyudha okanona hoka ka adhika megumbo noka kambadhala okugama kombinga yayina.
Shika osha eta opo aamwayinathana ya tameke okukondja. Anuwa okanona oka kutha ombele e taka tsu mukwao monhulo. Omumati ngoka gwomivo 18, gwedhina Mathanael Johannes, opo a sile mpoka.
Otaku hokololwa kutya okanona hoka ohaka gamene shito yina ngele ta nyenyeta nanakuningwa oshihakanwa oshoka anuwa oha piyaganeke aanegumbo ngele a za koondingosho.
Moshiningwanima sha faathana, omukiintu gwomimvo 24 ngoka anuwa a dhipaga omumwayinamati gwomimvo 30 sho e mu tsu nombele meehuliloshiwike okwa tindilwa eyifutilemo.
Omutamanekwa Rosalia Abraham okwa holoka mompangu yamangestrata yOkongo komeho gomupanguli Adriana Sangunju mOmaandaaha.
Omweeti gwiihokolola gwepangelo Pallhus Shuudeni okwa li a gandja omatompelo kutya omutamanekwa ita vulu okupewa eyifutilemo omolwuunene woshipotha.
Oshipotha osha undulilwa komasiku 22 gaSepetemba nuumvo.
Oshiningwanima shoka osha holoka momukunda Oshikuni moshitopolwa shaHangwena.
Otaku hokololwa kutya Abraham okwa li a zi kookamba uusiku sho a adha aanegumbo ye ya kotha e ta tameke okunyenyetitha yina.
Shoka okwa li sha yematitha mumwayina gomumati Thomas Abraham ngoka a li a lombwele Abraham a mwene.
Oondjuma odha tameke pokati kanakusa naAbraham, sho anuwa a kutha ombele e ta tsu mumwayina gomulumentu nombele lumwe mepunda nokusa.
Kape na natango uuyelele wothaathaa kutya Abraham okwa li ta nyenyetitha yina kombinga yashike.
Oshinigwanima shoka osha holoka ashike omasiku gaali ga piti po sho omulumetu gwomimvo 26 a dhipaga yinakulu gwomimvo 88 sho e mu hahala nekatana e ta tema omulilo e te mu umbile mo.
Omulumentu ngoka taku hokololwa e na uuvu wopamadhiladhilo natango okwa monitha oshiponga aanona yomimvo 14 osho wo heyali e ya hahala nekatana komitse.
Omulumentu ngoka oku li ta mono uuhaku wopamadhiladhilo moshipangelo shaShakati.
Omupopiliko gwopolisi moshitopolwa shaHangwena Andreas Nghiyolwa okwa popi kutya iiningwanima tayi holoka moshitopolwa shaHangwena otayi limbilike.
“Unene ngaa pomindhingoloko gwOmungwelume, ohapu holoka iiningwanima yi nyanyaleka. Kehe omwedhi otu na okukala twa kundana onkundana tayi shololitha,” ta popi ngaaka.
Ta ti okwa koneke kutya omalongo moshigwana oga pumbwa okutulwa miilonga, oshoka iiningwanima iiwinayi otayi indjipala.