Opolisi moshitopolwa shaKavango East oya kwata ko uusila woshikukuta wa adhika anuwa tau landithwa kaafekelwa yaali momukunda Shaka Mbumba popepi noRundu.
Sha ikolelela kepeko lyopolisi oshiningwanima shoka anuwa osha holoka mehuliloshiwike momundhingoloko gwaRundu.
Otaku fekelwa kutya iikulya mbyoka yoshikukuta oya li yi na okutopolelwa aantu ye li mompumbwe.
Aafekelelwa mboka anuwa oya adhika nomakutu guusila 26, gookilogalama 20.
Opolisi oya ti, aafekelwa kakwa li taya gandja uuyelele mpoka ya kutha uusila mboka nenge uusilepa tau ulike mpoka ya landa. Aafekelwa inaya mangwa po kopolisi, ashike omakonaakono otaga tsikile.
Opolisi moshitopolwa shaShikoto oomwedhi dha yi okwa li ya lopota iikulya yoshikukuta ya yakwa, yongushu inayi tseyika.
Miikulya moka anuwa omwa li mwa kwatelwa ooshako dhuusila wepungu, iipakete yomagadhi gokulya, oshowo iipakete yoohi dhomondooha.
Natango nuumvo kOshivelo okwa li kwa kwatwa ooshako dhuusila wepungu dho26kg dhi li 34, iipakete iyali yomagadhi gokuteleka, iipakete iheyali yoohi dhomondooha, nooshako mbali dhomakunde omatiligane, nongushu yiinima mbika N$100 000.
Opolisi oya kala nokukunkilila oshigwana shi gandje uuyelele tawu vulu okukwathela opolisi yi dhitike aafekelwa mboka.
Omukuluntuwiliki mombelewa yomupilima I-Ben Nashandi okwa ti iikulya yoshikukuta kayi shi yaantu mboka yi ihole, ihe oya nuninwa aantu ye li shili mompumbwe yiikulya.
Nashandi okwali a yamukula ngaaka sho a li a pulwa koshifokundaneki shika opo a tye ko sha kiikulya yoshikukuta tayi fekelwa yi li pongushu yoN$100 000, mbyoka anuwa ya li ya adhika kofaalama yopaumwene.
Omupresidente Nangolo Mbumba okwa kala nokukumagidha oshigwana shi hulithe po okuyaka iikulya ya nuninwa mboka ye li mompumbwe shili.
“Iikulya kayi shi yokulandithwa po. Mboka ye li metonatelo lyayo naya kale ye na oshinakugwanithwa nokukwashilipaleka kutya oya gandjwa kwaamboka ye yi pumbwa,” ta kumagidha ngaaka.