Uuministeli wuuhaku nonkalonawa owa yambidhidhwa niikwathitho yongushu yoomilliona N$4 okuza kehangano lyoosamende Ohorongo oshowo kehangano lya zi koGerman tali ithanwa Ulm.e.v ndyoka hali gandja omayambidhidho ge na sha nuuhaku. Omupeviminista muuministeli wuuhaku nonkalonawa Esther Utjiua Muinjangue okwa ti omahangano ngoka gaali oga yambidhidha uuministeli niilongithomwa ngaashi oombete, uutemba, omampango niilongithomwa yokulanditha, oshowo iinima yilwe.
“Uuministeli wuuhaku owa pandula sho wa yambidhidhwa ngaaka, opo wu vule okutuma iilongithomwa komahala guuhaku hoka kwa kolota iilongithomwa,” minista ta popi ngaaka.
Ta gwedha po ta ti omayambidhidho ngaka otage ya kwathele wo okwiindjipaleka omahala guuhaku oshowo okukuta aaniilonga ya gwedhwa po oshoka ope na iilongithomwa ya gwana.
Ta ti, niitya yimwe, omayambidhidho ngaka otaga eta po oompito dhiilonga moshigwana, oshowo okufala omayakulo guuhaku popepi naamboka ye li kokule nomahala guuhaku.
“Okuyambidhidha niilongitho kuuministli wuuhaku kaku shi ashike okugandja, ashike okukaleka po wo uundjolowele mokati koshigwana,” ta popi ngaaka. Ta fatulula kutya uuna taku gandjwa omayakulo ge li ngaaka otaku hupithwa oomwenyo, oshoka ngele kape na iilongithomwa nenge iikwathitho nena kape na shoka aantu taya vulu okuyakulwa nasho.
Omukalelelipo gwehangano lyOhorongo okwa popi kutya oya yambidhidha ngaaka oshoka oya totha mo uuministeli wuuhaku owo hau dhana onkandangala onene moshigwana okuhupitha oomwenyo.
“Sho osho twa yambidhidha uuministeli opo wu vule nokutsikila okugwanitha po iinakugwanitha yawo, okuhupitha oomwenyo dhaantu osho wo okugandja omayakulo koshigwana shi kaleke po uundjolowele washo.” ta popi ngaaka.
Omumvo gwa zi ko natango ehangano ndyoka lyoUlm.e.v okwa li lya gandja iilongithomwa yoshipangelo yongushu yoshimaliwa shoomilliona N$1.8 kuuministeli wuuhaku.
-vkaapanda@nepc.com.na