Oshikondo shomeya muuninisteli wuunamapya omeya nomatendululo gevi osha tokola opo shi lundulule iikweyo noondungu ndhoka dha kala po moshitopolwa shaShikoto, noku dhi eta pomithika dhopashinanena, opo ku yandwe omaso gomomeya.
Omupevikuluntu muuministeli mboka Elijah Ngurare okwa ti elundululo lyoomboola ndyoka otali ka ningwa kaanambelewa yuuministeli mboka ye li mOmuthiya, taya ka longitha iilongithomwa mbyoka opo nale yi li.
Ndhika okwe dhi lombwele oshikundaneki shoNampa sha landula eso lyomulumentu ngoka a gwile nokusila moshikweyo komukunda Eendungu daKambwela moshikandjohogololwa shaNehale Lyampingana, mOlyomakaya.
Ngurare ta ti monakuziwa uuministeli owa li wa lundulula oomboola koTsandi nOnesi mOmusati noku dhi eta pomuthika gwoshinanena.
Okwa koleke kutya kapu na naanaa ngoka e na oshinakugwanithwa shokukaleka po omutungilo gwegameno kiikweyo nomithima dhopamuthigululwakalo nomolwashoka uumunisteli wa li wa longitha aatseyinawa momumvo 2021 opo ya konge mo oondungu ndhoka noku dhi shangitha.
“Shoka otatu shi ningi nekwatho lyaaleli yopamithigululwakalo tse tatu pula wo ooyene yiikweyo opo ya kwathele oshigwana momondhingoloko dhawo. Iikweyo mbika otayi ka tungwa pamukalo ngoka hatu tungu uundjugo, ano elambo tali tungwa noondhopi.
Okuza mpoka otaku tulwa oopomba noosola ndele oshinima tashi ya pamuthika gwomboola yopashinanena,” Ngurare ta ti.
Ngurare ta ti omeya ngoka ohaga longithwa unene kiimuna nokutekela iimeno, ihe inaga opelalela aantu oshoka oge na oshimongwa.
Okwa pula aakwashigwana opo ya sile oshimpwiyu oomboola ndhoka oshoka monakuziwa iilongithomwa koomboola ohayi yakwa po. –Nampa