Charles Ndeumane
ONGWEDIVA – Oonakulwa aakulu naakondjelimanguluko mboka ya li moshikondo shuuhaku pethimbo lyekondjelomanguluko oya li ya gongala mOngwediva mOlyomakaya ga zi ko opo ya dhimbulukwe nokusimaneka iilonga mbyoka ya longo pethimbo lyekondjelomanguluko.
Minista gwuuhaku nonkalonawa Dr. Kalumbi Shangula ngoka a li omupopi a simana poshituthi shoka okwa ti oondohotola naapangi yopethimbo lyekondjelomanguluko oya longa iilonga ya simana moku adha emanguluko lyaNamibia.
“Aayakuli yopaunamiti yekondjelomanguluko oya li ye na oshinakugwanithwa oshinene. Oya kwashilipaleke kutya aakwiita mboka ya ehamekwa oya yakulwa mbala opo ya shune ya ka lwe iita. Aakwiita yekondjelomanguluko oye na ontseyo yokulwa nekuthombinga lyawo miita olya li lya pumbiwa noonkondo,” Shangula a ti. Shangula okwa ti oonakulwa aakulu mboka ya kutha ombinga miita yekondjelomanguluko ohaya tsakaneke omashongo omanene mokweendela pamwe nemanguluko nehumokomeho oshoka iita oye ya hepeka pamadhiladhilo. “Oopolohalama dhi na sha nezulonkalo lyopamadhiladhilo odha simana koonakulwa aakulu mboka ya li miita. Oonakulwa aakulu otashi vulika ya tundwe kaakwashigwana nenge ya kale inaaya inekelwa molwomashongo ngoka ya pitila mugo,” osho Kalumbi a popi ngaaka.
“Ehangano lyiigwanahangano olya galulile aakondjelimanguluko yaNamibia kegumbo konima yiita yekondjelomanguluko ashike inali ya pa ehungomwenyo lyopamadhiladhilo lyi li nawa. Enyanyu lyokugalukila koNamibia olya li eshona koontauki odhindji dhaNamibia molwiilalo yopamadhiladhilo mbyoka ya eta kemono lyiihuna miita. Ngele ngoye ogumwe gwomaantu mboka taya hepekwa komadhiladhilo molwemono lyiihuna miita konga ekwatho. Epangelo olya tula po omayakulo gokukwathela Aanamibia,” Shangula ta tsikile.
Lwahugunina minista okwa indile oonakulwa aakulu ya kuthe ombinga momahogololo. “Limwe lyomomatompelo ngoka twa tokola okukutha omatati opo tu ye kiita tu kondjele emanguluko omolwaashoka otwa hala uuthemba wokuhogolola,” osho Shangula a popi ngaaka.