Yamwe yomiilyo yomutumba gwopashigwana mekwatelokomeho lyaminista gwelongo, aanyasha, omaudhano nuunkulungu Sanet Steenkamp osho wo omupeha gwe Dino Ballotti, oya li ya yambidhidha nokukutha ombinga  momadhewo koFITCITY Namibia koWindhoek.

FITCITY Namibia ehala lyomadhewo ndyoka lya li lya ningi oshinyangadhalwa pamwe nuuminsteli womaudhano okweeta oshigwana pamwe nokuulikilathana esimano lyomadhewo.

Oominista osho wo iilyo yomutumba gwopashigwana oya li wo ya kutha ombinga momadhewo moka.

“Nonando kakwa li oshipu, otwa kambadhala sigo mpoka twa hulile, ashike osha li tashi nyanyudha,” Steenkamp a shanga ngaaka.

Steenkamp okwa ti kutya omadhewo oshinina sha simana monkalamwenyo yomuntu kehe oshoka ohaku xwaxwameke uundjolowele womuntu.

Aanyasha oyendji mongashiingeyi oya itula mo momadhewo okukwatela po uundjolowele wawo. 

Yamwe ohaya longekidha okutondoka iinano ya yooloka momahulilo giiwike, moka oshigwana hashi kutha ombinga.

Maria Katangolo ngoka ha dhewula aantu kehala lyomadhewo kOkave mOshakati, okwa ti, okwa kala nokuninga omadhewo okuza momumvo 2020, nokwa mono eyooloko enene kolutu osho wo muundjolowele we.

“Ond ali ndi na olutu ihalu opala iikutu, ihe nena ongame ashike wa hala okutala,” ta popi ye ta imemeha mo.

Katangolo okwa ti omikithi odhindji odhe mu kala kokule oshoka niikulya mbyoka ha li nena okwe yi lundulula.

Ta kumagidha oshigwana shi tule uundjolowele wawo komeho.

-vkaapanda@nepc.com.na