OSHIKUKU – Omushingithi gwiimeno niiyimati okwa ti ombili oyi li miimeno, nokwa kumagidha oshigwana shi tsike iimeno momalukalwa gawo.

Rosalia Shikalepo ngoka a li ta landitha iimeno momauliko giipindi kOshikuku okwa ti iimeno oyi na ombili.“Ngele owa hala omwenyo goye gu kale gu na ombili aluhe kala wu na iimeno. Nuuna wa geya ee to yi talele po, ohayi eta ombili mbala momutima gomuntu,” ta kumagidha ngaaka. Shikalepo okwa ti oku na wo oshikunino shiiyimati ngaashi omahapela, omalemune, omasiilemune, ugalanadila, omakwaava, omamengo, omatama, omabanana, ondungu, oonyanga, omiti dhomizile, omoringa osho wo oshimeno tashi ithanwa eggplant.

Oshikunino she oshi li momukunda Oshitutuma kOshikuku. Ta ti oshimeno shoka shoeggplant ohashi vulu wo okupanga iikwamawawa uuna yi na uupuka momandjandja.

“Oyendji oya itaala kutya iiyimati ngaashi omahapela nomalemune ihaga kunwa kaaludhe, ihe okaatiligane ashike. 

Shoka epukitho moshigwana, ngame ondi shi oku shi kwashilipaleka oshoka oshikunino shandje, iyiimati oyindji onde yi kuna mo, onda kolota ashike okapichaa” Shikalepo ta ti ngaaka.

Ta hokolola ta ti oshikunino she okwa li e shi toto po 2013, konima sho a li a dhimbulula kutya ita vulu okumona iihuna konima sho a ndopa okumana eyilongo lye.

Ta ti okwa li a tameke ta kunu oonti dhoshiyimati kehe ta li, ndhoka hadhi kwata ashike omasiku ngele ogendji gaheyali, dho odha tsapuka mo mevi.“Okwa li nda tameke okutsika muundini uushona wokunwina nokulanditha koondola ashike ntano. Nena omiti dhiiyimati niimeno ye ohandi yi landitha koN$20 kehe mukamwe,” ta ti ngaaka. Okwa fatulula ta ti oyendji ihaye shi itaala ngele ta popi kutya omiti dhomahapela nomalemune ohadhi vulu okutula ko iiyimati. 

Tati nuumvo okwa kanitha omuti gomalemune ngoka gwa li gwa tula ko omalemune taga liwa ashike ogwa si po oshoka ohagu pula omeya ogendji noonkondo.

“Omiti ndhoka ohadhi pula oomvula dha thika puheya okutula ko iiyimati, inadhi fa omiikwava nomamango ngoka haga tula ko omvula kehe,” ta fatulula ngaaka.