OSHAKATI-Aanafalama yiimuna ye li po pepi noondoolopa monooli, oya hogolola omatoto giiyagaya onga omahala gokuhupitha iimuna yawo sho oshikukuta tashi geye.
Mboka ya li ya yi moonkundathana noshifokundaneki shika, oya popi kutya otaya palutha iimuna yawo niipakete, okuhupitha iimuna yawo oshoka ka kuna omahala gomwiidhi, momindhingoloko ndhawo.
Nonando aanafalama taya palutha iimuna yawo nomapakete ngoka taga adhika momatoto, iimuna oya taalela natango oshiponga, shiinima yaana okuliwa kiimuna.
Martin Shipiki gwomomukunda Okatana okwa ti, oha hingile iimuna ye kondoolopa, hoka kuna omatoto ga gongelwa omapakete, oshoka kapena omwiindhi.
“Otwa taalela onkalo ondhigu, katu na nkene tuna okuninga, ihe ota tu longitha kehe ompito ta tu mono, okuhupitha iimuna yetu, kaayi se,’’ ta popi ngaaka.
Ta ti, onkambandhala oyi vule okumwena, otaya kondjo naashoka shi li po, pamwe iimuna yawo tayi thiki komuloka gwa landula ko. Ta gwedha po ta ti, oyena ontseyo yomauwinayi taga vulu okuholoka po, uuna iimuna yali iinima inaayi wopala momatoto, ihe shoka kayena shoka taye shi ningi.
“Omwiindhi gwiimuna oguna ondilo, ngaame ihandi longo. Otandi gu landa ngiini, ngele okapandi kamwe otaka pula nale N$950,’’ ta pula ngaaka.
Simson Katangolo okwa ti, oha fala iimuna ye komatoto iikando iyali nenge itatu moshiwike.
“Ota tu ningi ngiini ngele, oshikukuta shoka twa uvanekelwa inashi tameke natango? Otuuka nale ke huulilo lyomumvo, hoka omvula hayi loko, oshikukuta otashi ka gandjwa ethimbo peni,’’ ta pula ngaaka.
Ta popi ta ti iimuna yawo, otayi ende tayi lunduluka komalutu, oshoka omwiindhi kapena sha, sho shoka haya lithile momatoto.
Saima Shivute gwomokunda Ongali okwa ti, ohayi kOshikuku, taka konga oombapila nomapakete, konima yoositola.
“Ondjala yi li ko yonuumvo, oyetu ndhenga noonkondo, okuza momapya sigo okiimuna,”ta ti ngaaka.
Ta gwedhapo ta ti, omasiku ngaka, egulu olya kala ta li gandja omukumo, pamwe shiyenga tega dhenge pevi, go omwiindhi gu tsapuke. Uupyakandhi wumwe wa kala wa taalela aanafalama, omeya, ashike ookansela yamwe oya li ya kundaneke omasiku ga ziko kutya, omeya ngoka ga li ga pombwa okuza mondama yEtaka oga thika miikandjohogololo yilwe.
– vkaapanda@nepc.com.na