Victoria Kaapanda
ONGWEDIVA-Justine Mandume a yambukile momukunda Onawa moshitopolwa shaShana okwa yemata kokufutila mo iimuna ye okuza koshigunda shelelo lyondoolopa yaNgwediva, hoka ya edhililwa notayi sile ko ondjala.
Mandume moonkundathana naKundana okwa popi ta ti okwa loloka okukala ta futile ko iimuna ye koshigunda shamuni uuna ya kwata po, hoka he yi futile ko N$30.60 kehe moshimuna nakehe esiku nongele siku ndyoka ina mona oshimaliwa shokufutila ko iimuna ye nena oku na okufuta omasiku agehe ngoka iimuna ya lala moshigunda shamuni.
“Eelelo lyondolopa yaNgwediva olya hala tu fale iimuna yetu peni ano nani, ngele mpaka tu li opo twa valelwa po opo pwa kala uulithilo wiimuna yetu? Ngele oye wete kutya pehala mpaka tu li opehala lyawo nenge omondoolopa ngaashi taku ti, oshike itaye tu futu po tse tatu ka konga omahala gomapya nogiimuna yetu kokule, nenge ye tu kongele omahala.
Otwa loloka nayi” Nangombe ta ti ngaaka.
Nangombe ta ti iimuna yawo ngele ya sile koshigunda shamuni ihaya futwa, ihe muni oha ka ekelahi ashike, ashike iimuna oyi na ondilo okusila ashike moshigunda medhina lyondjala.
Ta gwedha po ta ti yo kaye na iimaliwa yokukala taya futile ko iimuna yi li pehala lyawo kehe siku, pehala mpoka ya pewa kape na omwiidhi gokuliwa kiimuna yawo, ihe ngele iimuna yamuni ya gwaya ko koshigunda shawo, nokumatukila mepya lye, oshoka oye li popi noshigunda, muni ina hala oku mu futa.
Omupopiliko nomugandji gwomawuyelele mombelewa yelelo lyondoolopa yaNgwediva Jackson Muma okwa ti elelo lyondolopa lyawo oli na oompango nomilandu ndhoka dhi na okulandulwa kaakalimo yomoshitopolwa shaNgwediva.
“Elalakano lyetu kali shi lyoku edhilila iimuna tu yi kaleke moshigunda shetu ashike olyu ku keelela omawupyakadhi taga vulu oku etithwa kiimuna ngaashi okupumwa kiihauto shoka tashi vulu oku eta iiponga moshigwana nokuyonagula po iimeno yomagumbo gaantu”. Muma ta ti ngaaka.
Ta gwedha ko ta ti shoka tashi popiwa kutya iimuna oyi liko tayi si ondjala kasha shi nando oshili, ta ti ye mwene oko a li koshigunda ihe iikulya, omeya oshowo omuzile kape na sho sha kolota ko nando.
Muma ta ti ngoka a hala okutembudhwa nokumonenwa ehala limwe epe okwa manguluka oku kala a thika pombelewa yelelo lyondoolopa yaNgwediva, nokufatulilwa oshowo oku longekidhwa ashihe shi na okuningwa po opo a tembudhwe.