Omugandji gomauyelele muuministeli womidhingoloko iihwa nomatalelepo Romeo Muyunda okwa ti, iinamwenyo ayihe iishona niinena oya gamenwa, no inayi pitikwa okudhipagwa.
“Iinamwenyo ayihe yo momakuti nomiihwa inayi pitikwa okudhipagwa kaape na epitikilo okuza kuuministeli womidhingoloko,” ta fatulula ngaaka.
Ta ti, iiyamakuti ayihe oya gamenwa, onkene ngele gumwe okwiikuthile oveta momake ge ete shi ningi, okuna okupewa egeelo.
Muyunda okwa ti, moka omwa kwatelwa iiyamakuti ayihe niishona ngaashi oonikitha, uulimba, ookakala no sho tuu.
“Kehe oshinamwenyo shili kombanda yevi oshina oshilongo, no sha pumbwa okugamenwa opo kaashi dhipagwe po,” ta fatulula ngaaka.
Ta gwedha po kutya oyendji kayena ontseyo kutya iinamwenyo mbyoka iishona nayo oya gamenwa , no haya ikuthile ooveta dhawo yene okuyi dhipaga.
Muyunda okwakumagidha oshigwna shi ikaleke kokule niinamwenyo mbyoka opo kaashi iyetele omaupyakadhi.
“Iiyamakuti ngaashi oompanda, oondjamba oshowo oongaka oonkalamwenyo dhawo odhi li moshiponga oshoka oyo unene hayi dhipagwa omolwongushu yiilyo yawo,” Muyunda ta ti ngaaka.
Ta ti, nonande ope na egameno lya kwata miiti okukeelela iiyamakuti yi dhipagwe kaashi li paveta, natango oshigwana ohashi kambadhala okulongitha oompito adhihe, okukonda ooveta ndhoka.
“Otwa ndhindhilike kutya aantu mboka haya dhipaga iiyamakuti ya gamenwa, uunene aanafaalama ye li moluhepo taya tumwa kaanangeshefa oshowo kaaniilonga aakuluntu yepangelo, yo taya ka futwa,” ta fatulula ngaaka.
Muyunda okwa popi ta ti, omumvo gwa yi iipotha yi li 40 okwa li ya lopotwa moka mwa kwatelwa edhipago lyoompanda oshowo aantu ya adhika nomayinga goompanda,” ta ti ngaaka.
Ta fatulula ta ti, iipotha yoompanda yi li 14 oya lopotwa momwedhi gwOctokomba ashike, omanga iipotha yi li 26 yalopotwa pokati kaNovomba naDesemba omvo gwayi.
“Aagameni yiiyamakuti mEtosha omumvo gwa yi oya longa nuudhiginini, oshoka omwaalu gwiipotha ya lopota ogwa shuna pevi, ngele tagu yelekwa niipotha yomimvo dha piti,” ta fatulula ngaaka.
Romeo okwa kumagidha oshigwna shi kale tashi gamene iinamwenyo, ihe hakuyiningila omiyonena.
– vkaapanda@nepc.com.na