Charles Ndeumane

Uufuthi wiimuna onkene wa uka pombanda moshitopolwa shaMusati, nopolisi otayi ti ope na ekwatathano pokati kAanamibia nAaangola mboka taya kutha ombinga muufuthi wiimuna.

Oshiwike sha zi ko ngoloneya gwoshitopolwa shaMusati Erginus Enandja okwa lombwele onzonkundana ndjika kutya uufuthi wiimuna owo wumwe womiimbuluma mbyoka tayi dhana onkandangala moshitopolwa shaMusati na kapu na endhidhiliko lyokushuna pevi.

Ndhoka odha kolekwa ku inspekta gwopolisi moshitopolwa shaMusati Anna Kunga, ta ti iipotha yuufuthi wiimuna yi li 208 oya lopotwa moshitoplwa moka okuza muJuanuary sigo oSepetemba nuumvo. Anuwa iipotha oyindji yomuyo oya kwatela mo oondoongi.

“Opu na ekwatathano pokati kaafuthi yiimuna Aanamibia naAangola, oshoka iimuna mbyoka tayi yakwa moNamibia ohayi hingilwa moAngola, omanga Aaangola taya yaka iimuna ndele taya landitha moNamibia. 

Poompito dhimwe aafuthi yiimuna ohaye yi dhipaga ndele taya dhingula, yo taya ende nee taya landitha oondhingu unene ngaa oondoongi niikombo. Ethimbo limwe oondongi ohaye dhi  landitha kwaamba ya hala oku dhi pululitha.” Kunga ta ti ngaaka.

Kunga okwa ti oyendji yomAaangola mboka haye ya okuyaka nenge okulanditha iimuna moshitopolwa ohaya kwatwa, ashike yamwe ohaye shi pondola okufadhuka po oshoka ohaya kala ye na oonzo dhawo ndhoka hadhi ya yakele ko uuna opolisi yi ya li mokashoko opo ya fadhuke po mbala. –mrndeumanryacharles@gmail.com