UUKWAMBI – Elenga lakula lUukwambi Herman Ndilimani Iipumbu oo ta wilike oshitunda osho okwa kunghilila ovo ta ti otava pukifa oshiwana kutya ina dja mepata lovakwaniilwa opo va xulife po okupopya omipopyo doipupulu. 

Nonande ina yelifa kutya okwa dja medimo leehamba ile ahawe, Iipumbu okwa ti, yo ota lele shili paveta, naavo tava popi kutya ke na eenghono dokulela oteke va landula paveta opo vaka hokolole kutya okwa kufwa naini eenghono odo. 

“Fiyo onena inandi mona ombapila tai ti kandi na eenghono dokulela. Ondi li handi lele paveta,” ta ti. Edi Iipumbu okwe di popya Etitatu pefimbo lomutumba oo a ninga noovene vomikunda osho yo omalenga a dja melelo laUukwambi. 

Okwa ti, omutumba ohau ningwa omudo keshe momwedi Febuluali ashike omudo wa dja ko inava ninga omutumba molwefyo lOmupresidente Hage Geingob. 

Okwa ti natango neudo momwedi Febuluali inava ninga omutumba molwefyo lOmukokolipresidente Sam Nujoma. Iipumbu okwa ti elalakano lomutumba okulombwela oovene vomikunda noshiwana osho sha monika po ile osho tashi dulu okutulwa moilonga. Okwa weda po ta ti natango ova kundafana kombinga yomashongo a taalelwa kelelo osho yo oikumungu yovanhu tava shange komalungula kutya ita lele paveta. “Otava popi kutya kandi na eenghono dokunangeka. Nashi mone exulilo meendelelo,” ta ti. 

Okwa yelifa ta ti ovanhu okwa li va fatulilwa kombinga yoinima oyo tai linyenge melelo. 

Pefimbo lomutumba oshiwana okwa li sha mona omhito yokupula omapulo kombinga yoipambele yelelo. 

Iipumbu okwa ti ovanhu vamwe ove mu twala komhangu tava ti kutya ke na oufemba wokulela ashike inava findana. 

Okwa yelifa ta ti okwa lela omido 40 noku na omikanda domondjila dokulela odo da pewa omalelo opamifyuululwakalo konima oshilongo sha manguluka. 

Iipumbu okwa kumaida oovene vomikunda va twikile okulonga nelitulemo nokuyakula nawa oshiwana. 

Okwa pula oshiwana opo shi kale nombili noukumwe moshitunda shUukwambi ngaashi naana omalelo opamifyuululwakalo e na oukumwe moshilongo. 

-fhamalwa@nepc.com.na