Aalongwa yokiiputidhilo yo pombanda oya kumagidhwa ya kale taya lopota uuna ya tindilwa ompito yokwiishangitha.
Ndhoka odha popiwa kuamushanga gwelongo mewawa lyaanyashayo yongundu tayi pangele lyoSwapo party youth league (SPYL), Hofni Iipinge.“Ombelewa yetu yoSPYL oyi li mekwatathano ewanawa noNSFAF oku kwashilipaleka kutya aalongwa oya futilwa eyilongo lyawo, kiiputudhilo yo pombanda,” ta ti ngaaka.
Ta ti, elongo oshinima shasimana, sho shoka ongundu yoSwapo yali ya pititha momushanga gwoku uvaneka, kutya oya tengeneke oshimaliwa sha gwana okuyambidha aalongwa yeli kiiputudhilo yo pombanda.
“Oshinakugwanitha shetu oku kala twa kwashilipaleka kutya aanyasha oya mona ompito ye yilongo lyongushu, koosikola dho pombanda oshowo kondje yiilongo,” ta popi ngaaka.
Iipinge ta ti, okuuviteko kutya iiputudhilo ayihe ka kwali tayi vulu oku futwa pethimbo limwe, ihe mongaashingeyi iiputudhilo ayihe oya futwa kuNSFAF. Tagwedhapo ta ti, iiwike iyali ya piti uuministeli wemono owa gandja oshimaliwa kuNSFAF okufuta iiputudhilo ayihe. “Onda dhidhilike kutya oosikola dho pombanda ohadhi tindile aalongwa okwiishangitha, shoka hashi ya thiminike oku kaninga omakanka,” ta ti ngaaka. Iipinge okwati, oosikola dhoka itadhi pitikwa nando oku tindila aalongwa ya ishangithe omolwa kaapena oshimaliwa ethimbo ndyoka.