SWAKOPMUND Oshikondo shuukalinawa otashi ka pumbwa okuyamukula komaupyakadhi ga guma iiyakulitho, omatungo, iiyenditho oshowo ompumbwe yaanambelewa ya pyokoka miilonga opo shi vule okukaleka po omayakulo ga nuka nogongushu koshigwana. Pethimbo ndika, oombelewa dhUuministeli wUundjolowele nIilonga yOnkalonawa paendondo dhopashigwana nopaitopolwa odhi li momatungo ga kulupa, ngoka ga nika oshiponga kuuyogoki kungoka haya kala mo, omanga omahala goombelewa, iipoleki niiyakulitho yopautekenika ya tothwa mo kutya oyi li yimwe yomomaupyakadhi ngoka. Iitopolwa mbyoka kayi na iiyakulitho yi ihwapo ongaashi oshikondo shepango lyomeho moWindhoek Central Hospital, oshikondo shezulonkalo, ompumbwe yoombelewa miipangelo paendondo dhopaitopolwa, iikondo yuuhaku waampwidhi miitopolwa yimwe oshowo oombelewa dhiikondo lyuundjolowele miitopolwa yimwe. Kakele kaambyoka, uuministeli ou na natango ompumbwe yaaniilonga yuutekenika nuuindjiniya mboka haya longo momahala guukalinawa, shoka sha nika oshiponga kegandjo lyesiloshisho lyopauhaku. Aaniilonga yesiloshimpwiyu lyopauhaku mboka ya pyokoka miilonga unene oye li aakwiilongo, onkalo ndjoka itayi shilipaleke etsikilo lyomayakulo ngoka ngele aanambelewa mbaka oya shuna kiilongo yawo. Omikundu noompumbwe dhika odha ndjandjukununwa mosheetwapo shOshikondo shUukalinawa (Thematic Working Group) shoka sha gongalele moSwakopmund mOmaandaha netiyali. Oshitopolwa sha simana osho ongushu yonkalamwenyo, nomalalakano gasho okushunitha pevi etaandelo lyombuto nomukithi goHIV/AIDS pamwe nomaupyakadhi gayo. Okukaleka po ongushu nesiloshisho lyuukalinawa tau vulu okumonika nuupu oshowo esiloshimpwiyu lyopankalathano, evudhomo lyondjala nuuthigona womutoko. Oshigongi shoka shoThematic Working Group (TWG) osha hanganeke iiyetwapothaneko okuza kiikondo yayooloka mbyoka tayi ka ninga oshitopolwa shOndungethaneko Ontintatu yOoproholama dhOmapendulopo gOpashigwana – NDP3, ndjoka kwa tegelelwa yi tseyithwe pambelewa kuyele muAguste nuumvo. Iinima mbyoka ya simana kongushu yonkalamwenyo oya kwatela mo omayakulo ga dhoga gopaundjolowele, okumona nokuthika nuupu pomayakulo ngaka shoka tashi gandja ompito kaakwashigwana ya vule okulumba oonkalamwenyo dhawo dhi na uundjolowele. Omalalakano gopatatu oga kwatela mo iinima yayooloka yi nasha nuukalinawa, elongo, omeya nomalukalwa – omagumbo. Bertha Kavitjene, Omupehakuluntuwiliki gOmilanduveta nOmathaneko mUuministeli wUundjolowele nIilonga yOnkalonawa, okwa kundaneke oshifo shika metiyali kombinga yiisimanitsa yi nasha nonkalamwenyo yi na ongushu, mbyoka inayi kwatela mo ashike iiyakulitho yopaundjolowele, kakele oya kwatela mo wo aanambelewa ye na ontseyo nokupyokoka miilonga yawo oshowo omatungo. Omunambelewa omukuluntu moshikondo shiilyo yolutu yopaunongononi, Hongo Amola mosheetwapo she ota ti miitopolwa yepango lyomeho miipangelo yepangelo kamu nando iiyakulitho tayi opalele moshilongo ashihe. Moshipangelo shaShakati kamu na iitopolwa yepango lyuupwidhi waanona naagundjuka, olambolatori yiilyo yolutu yopaunongononi, moshipangelo shaRundu kamu na oshitopolwa shepango lyaapwidhi omanga moshitopolwa shaapwidhi moshipangelo oshinene shaVenduka kapu na iiyakulitho naanambelewa yi ihwapo. Uuministeli owu na iiyenditho 1 000 ya kwatela mo omambakumbaku, oombesa, omaloli, oohambulasa, iihauto hayi nana akuhe yiikoto iyali, uutemba wokuhilwa nomapakapaka gomagulu gane. Kakele konkalo yuukulupe wiiyenditho mbika, yimwe ohayi pumbwa oseevesa yi na ondilo noonkondo. “Shika ohashi nayipaleke egandjo lyomayakulo ga pumbiwa noonkondo unene koohambulasa niihauto mbyoka hayi longo nooproholama dhokufala omayakulo koshigwana mbyoka ya kulupa, ishewe inayi gwanena,” Amola ta ti. Ta gwedha po kutya ompumbwe yoshimaliwa okulanda iiyenditho ohayi yi moshipala egwedhopo lyiihauto yimwe oshowo iiyakulitho yilwe ya kulupa oshowo omalunduluko gopautekenika.