ONGWEDIVA- Opolifi oya koleka kutya ope na ovanhu tava patulula oibofa tava ti ovakwatwa onghonga mboli oipupulu.
Shimwe shomoibofa oyo yoipupulu osha patululwa oshivike sha dja ko kOhangwena, kokamatyona keedula 15 oko ka lopota kutya oka kwatelwa onghonga motuwa tai ende kovalumenhu vavali.
Okamatyona aka okwa li ka popya ehokololo li halula, ka lombwela opolifi kutya oka lefa okatuwa kokaPolo oku dja pOndobe taka i kEenhana. Vati manga a li motuwa ovalumenhu ava a hanga mo ove mu kufila eembele, tave mu kwata onghonga, noku mu kufa oN$500 osho kwa li sha tuminwa kongodi noewallet.
Mboli ehokololo olo ka yandja tali di fa omaxwilili oipupulu yongaho – oshimaliwa oke shi dana po okabetinga.
“Okamatyona okwa li ka tumwa keefitola pOkahenge-Ondobe kaka naneko oshimaliwa ashike oke shi dana po okabettinga,” Omulukunhu koshikondo shokukonakona oimbuluma mOhangwena omupedu Commissioner Zachariah Amakali ta hokolola
Amakali ta ti opolifi oya tala kokafano oko ke li peshina lokunana oimaliwa oko ka ulika okamatyona taka naneko oshimaliwa. Omakonaakono opaunamiti a ningilwa kamatyona nao kae na oidjemo tai ulike kutya okakwatwa onghonga.
Oshiningwanima shikwao shitalala osha ningwa mOshakati, omo omukainhu umwe vati a patululila omulumenhu oshibofa.
Omakonakono eshi a pwa okuninga oidjemo oye tai ulike kutya omukainhu okwa li ta pula okufutwa komulumenhu konima yoku ya naye moixulo, ina kwatwa onghonga shili.
Opolifi oya kumaida ovanhu opo va kale tava lopota oibofa yomakwatonghonga pefimbo ashike nai kale yoshili, i na oumbangi wa yela. Omupopiliko wopolifi omupedu Commissioner Kauna Shikwambi onghelao kwa lombwela Kundana ta ti oibofa yomakwatonghonga ihe na oumbingi wayela oidjuu okuningila omakonakono.
Shikwambi okwa yelifa ta ti opolifi omafimbo amwe ohai lopotelwa oibofa yomakwatonghonga oipupulu.
“Konima ngeenge omunhu okwa patulula oshibofa kutya okwa kwatwa onghonga opolifi ohai ningi omakonakono sheli kolelela koumbangi wa pewa opolifi,” ta ti.
Okwa ti ngeenge opolifi oya ningi omakonakono, oidjemo ohai dulu okukala tai ulike kutya omunhu mboli ota popi oipupulu.
“Omukainhu umwe ota dulu okulopota kutya okwa kwatwa onghonga konima ngeenge omulumenhu a dopa okumufuta ile ngeenge omulumenhu a hala okuxulifa po ekwatafano lavo lopaihole,” Shikwambi ta ti.
Okwa weda po ta ti ovanhu ohava kala ve na omalalakano okukakeka omadina avakwao monima ihe na oushili.
Okwa ti ovalumenhu ovo unene va ninga oihakanwa yokupatululilwa oibofa yomakwatonghonga pa mikalo da yooloka.
“Itandi ti kutya ovalumenhu otava lundilwa ile handi popile ovalumenhu, ashike opolifi oya didilika tai lopotelwa oibofa yomakwatonghongna ehe na oumbangi woshi li,” ta ti.
Shikwambi okwa ti opolifi oya didilika yoo vali oibofa tai lopotwa kwalata osho shi li eshongo linene kopolifi.
“Omunhu umwe ota ka patulula oshibofa konima yeedula mbali ile odula imwe eshi kwa li a kwatwa onghonga. Onghee oshidjuu opolifi i kala ya ninga omakonakono noupu molwashi iha pa kala pena oumbangi wayela.