Taimi Haihambo
Peter Tuukondjele omunamido 31 okwa ti eifano laye eli kwa li eke li hongela koshiputudilo shaNUST okwe li xulilifila ondjila kati shaashi ka li elihole, osho shaetifa atwe eenyala daye momaxwaxwameko oipindi.
Tuukondjele vati pefimbo ali koNUST okwa li te li hongele oLand Administration, ashike nande ongaho hayo lela kwa li a hala. “Onda kala lela nda hala oku li hongela oshiima shanyama kounamiti, ashike omolwa oikwafifo hongo ina shi ka pita,” ta yelifa.
Vati pefimbo olo a kala moWindhoek, okwa kala ha ningile omahangano a yooloka mwa kwatelwa eefitola omaxwaxwako oipindi nelalakano kwali loku li monena po odola yomondjato shaashi onghalo yaWindhoek ohai dulu okulula.
“Eshi nda tameka oku kala handi xwaxwemeke oipindi onda kwatwa kohokwe, shoo osho sha efifa nge ofikola ndi katameke ongeshefa yoludi eli moshitopolelwa shanooli,” ta hokolola.
Ongeshefa yoku xwaxwameka ei yatamekwa ku Tuukondjele ohai tula omapulakata kombada yee taxi ohaa ufanwa LED Taxi Billboards e na omadina eengeshefa. Ta ti oshikonga eshi oha shi ifanwa ‘Ride Marketing’ ile omaxwaxwameko omeelefa. Omapulakata aa ohaa longo kolusheno, no haakala a tema kombada yotaxi ngeenge tai tondoka taa ulike oipindi ei ili moshitopolwa, eefandifa ile oivilo ili pokuholoka naai tai ka holoka moshitopolwa.
Vati elalakano loku tula omaLED Billboards keetaxi, oku twala ouyelele popepi novanhu, shaashi eetaxi ohadi tondoka keshe pamwe.
“Eshi ha tupopi paife ngaha ongeshefa yange onde i tula keetaxi dafika punhee, odo hadi longele pokati kOshakati, Ongwediva noNdangwa. Ovashingi veetaxi edi ohandi va futu omafele atano komwedi,” ta ti.
Okwa twikila kutya okuna edilaadilo loku weda po omaLED Billboards a ninge mahapu yee ea andjakanife noshilongo ashishe.
Tuukondjele okwa twa omukumo ovanyasha aveshe ava ve li moiputudilo tave li hongele omaifano inave a hala opo va shikule eendjodi davo nande ove wete di li momapandaavanda. Okwa ti yoo ngeenege opena vamwe ve li momangeshefelo va hala oku andjaneka eengeshefa davo ve mumone, yee pamwe nongeshefa yaye oyo i li mOngwediva