Omulumenhu weedula 47 okwe lihanga konima yekumba molwoshimbuluma shi fifa ohoni eshi vati a kwata onghonga omonakadona weedula 18 oo e na oudu wopamadilaadilo.
Oshiningwanima osha ningwa oshivike sha dja ko meumbo lavo momukunda Ongulugumbe moshitukulwa shaMusati.
Omukulunhu koshikondo shokukonakona oimbuluma mopolifi kOmusati, omupedukomufala Moses Simaho okwa hokolola ta ti omufekelwa okwa ifana okaana kaye monduda yaye yokunangala, omo e ka kwatela onghonga.
Nakuninga oshihakanwa okwa twalwa koshipangelo opo a ka ningilwe omakonakono opaunamiti nokupewa omayakulo exungomwenyo.
Omufekelwa okwa kwatwa po nota pangulilwa oshibofa shekwatonghonga.
Oshiningwanima shikwao, omukainhu weedula 30 okwa kwatwa onghonga kovalumenhu vavali pefimbo kwa li ta di keendingosho nookahewa kaye.
Oshiningwanima osha ningwa mexuliloshivike molukanda Saamstaan modoolopa yaKahandja efimbo loufiku.
Opolifi oya hokolola tai ti nakuninga oshihakanwa okwa li ve li mondjila navakwao, pefimbo a kanduka mo mondjila a ya konima yoshixwa eke livatele.
Vakwao vati inave mu teelela, ova twikila ashike nondjila. Manga te livatele, omukainhu ou okwa nukilwa kovalumenhu vavali va dja moixwa ve kwete eembele ndele tave mu longele omunyonena wopaixulo.
Omukainhu ou okwa kufwa yoo vali ovili oyo kwa li a djala noshoyo eexwiki nokakeenisa oko ka li komutwe waye.
Ovafekelwa ova faduka po. Omakonakono opolifi otaa twikile moibofa aishe ivali.