Omulumenhu weedula 44 okwa tambulilwa moshipangelo shaShakati koICU konima eshi vati a tetaulwa nomakatana kumumwainamati weedula 46.
Oshiningwanima osha ningwa Etitatu komukunda Oshikondiilongo moshitukulwa shaShana efimbo loufiku. Omupopiliko wopolifi moshitukulwa shaShana Inspekta Thomas Aiyambo okwa hokolola ta ti fiyo opapa kape na ouyelele kombinga yoshietifi shoshiponga eshi.
Onghee okwa ti omakonakono opolifi otaa twikile kombinga yoshikumungu eshi. Omufekelwa okwa kwatwa po nota pangulilwa oshibofa shonghendabala yedipao. Oshiningwanima shikwao, okakadona keedula 15 ke na eteelelo oka kwatwa po shaashi vati ka dipaa omulumenhu nombele papuko. Oshiningwanima osha ningilwa modoolopa yaWalvis Bay Etivali.
Nakufya okwa tongolwa oye Ritjiwee Soroseb weedula 27. Opolifi oya hokolola tai ti okakadona oka pukifa nakufya nomulumenhu umwepo ou vati kwa li a ponokela nokudenga omulumenhu wako Omaandaxa. Onghee vati okwa li ke shi ngeenge oka twa omulumenhu ou a dengele mwene wako.
Ovalumenhu va denga omulumenhu wokakadona ova kala nokuningila omatilifo okakadona kutya otava kufa mo eteelelo neembele. Onghee vati okudja opo okakadona aka oka kala haka ende alushe nombele ngeenge ke li meepandaanda lavo. Opolifi oya yelifa tai ti omulumenhu a dipawa kakwa li a kufa ombinga mokudenga omulumenhu womufekelwa.
Oshiningwanima shikwao, olutu lomukainhu ole lituwa mokanaala onghela mOshakati efimbo longula. Otaku hokuhololwa kutya fiyo opapa kape na ouyelele kombinga yomukainhu ou kutya olyelye. Onghee opolifi otai indile moshiwana kwuau a kanifa omupambele waye opo a talele po okila yopolifi mOshakati.
–fhamalwa@nepc.com.na