Omhangu yamangestalata mOshakati oya yandja ehandukilo leedula o12 kovalumenhu vane molwomunyeka kwa homatiwa ve u ningile mo2016.

Ovatauluki voveta ava ova lopotwa va ninga omunyeka mongeshefa yomahooli pOneshila mOshakati ndele tava kufa mo oshikefa sha li shi na oimaliwa yomwaalu woN$4 500.

Omadina avo Erastus Shimwooshili, Simon Mathews, Samson Shaningwa naKamati Nestory Mumangeni.

Ovafekelwa ava ova kala va idililwa modolongo yaMungwelume oule weedula tadi ka fika puheyali, nova holoka momhangu omwedi wa dja ko ve ya okupewa ehandukilo.

 Okwa hokololwa yoo kutya epangulo loibofa yavo oya li yeli kolelela koibofa ihamano keshe umwe, mwa kwatelwa eteyo lomahooli Oneshila eli le va pefa eedula 12 keshe umwe.

Oiningwanima ikwao oya li oibofa ivali yelongifo leendjebo dihe na eembapila keshe umwe okwa pewa ehandukilo leemwedi 12. Oibofa ivali yelongifo deeholo oye va pefa keshe umwe ehandukilo leemwedi hamano. 

Ovafekelwa natango ova pewa yoo ehandukilo lomafiku 90 keshe umwe konima eshi va hangikile yoo ve na oilongifo yokuteya omaumbo pefimbo loshiningwanima.

Omukulunhu womhangu Mwilima Mwilima okwa ti ovafeekelwa ava konima eshi tava ka mana okulongela ehandukilo lavo kodolongo yaLuno, natango ova teelelwa vaha ka kume nande ondjebo meenyala davo oule weedula mbali.