ONGWEDIVA-Omubiisofi e li moshipindi shopendjela Veiko Munyika okwa ti osha fimana ngeenge ovanhu tava longifa omaunongo avo opo va dule oku li monena oyuuyemo.
Munyika okwa ti opena ovanhu vahapu va pewa omaano ounongo ashike ihava longifa moinima ei tai dulu oku va etela oyuuyemo.
Edi Munyika okwe di popya moshipopiwa shaye koshiviloxupulifo shaSadrag Theofilus Nakale mongeleka yaGloria Dei mOngwediva oshivike sha djako.
Nakale okwa fudikwa Olomakaya komukunda wavo kEkoka moshitukulwa shaHangwena Olomakaya.
Ovalilifya va dja keembinga neembinga ova tanga Nakale onga omulumenhu omunambili ha longo noudinini oku li monena oyuuyemo.
Munyika okwa ti oshiwana nashi ku feko oshihopaenenwa shaNakale shaashi Nakale ka kwa li e hole ondjala noluhepo eshi a kwa li ta longifa ounongo waye mokwiimba eengalo.
Okwa ti Nakale okwa kala hai imbi eemhongo momikunda ta kongo okamaliwa komandjato, onghee Nakale ka kwa li a kwatakwata ngeenge tashiya pokukonga ouxupilo.
“Ina mu teka omukumo okulongifa ounongo weni. Osha fimana ngeenge omunhu ta hambula po ounongo waye,” Munyika ta ti.
Munyika okwa weda po ta ti opena vamwe va yandja eemhito doilonga kuvakwao tashi pitile mokuninga eengeshefa.
“Itashi ti kutya ngeenge omunhu ina longwa ita dulu okukala e na oshimali. Ovanhu na xulife po okukala va tila okuulika ounongo wavo,” ta ti.