Onkalo yomambakumbaku inaaga gwana moshilongo yomumvo kehe otayi ka hwepopala, sho epangelo lya landa omambakumbaku ge li 350 komiliona N$300.
Omambakumbaku ge li 168 oga gandjwa kuuministeli wuunamapya, omanga ge li 182 ngoka ga hupu po, taga kanandjanekwa kiitopolwa ya yooloka.
Omugandji gomauyelele muuministeli wuunamapya Jona Musheko okwa ti, omambakumbaku ngoka okwa li ga landwa nelalakano lyoku indjipaleka iilonga yuunamapya moshilongo.
“Omambakumbaku okwa li ga indjipalekwa omolwa omaindilo ga kala taga ningwa okuza moshigwana, unene pethimbo lyomvula sho taya tameke okulonga omapya gawo,’’ ta fatulula ngaaka.
Aanafalama yomiitopolwa ya yooloka omimvo dha piti oya kala noku ninga omaindilo gomambakumbaku ga indjipalekwe, oshoka ohaga kala inaaga gwana pethimbo lyokulonga omapya gawo.
Maria Newaka gwomomukunda Onaanda okwa ti, omambakumbaku gepangelo ohaga kala uupyakandhi aluhe, oshoka ohaga kala taga kondjelwa oshoka kehe gumwe okwa hala okuli longitha omolwa ondando yago yili pevi. “Ohashi kala oshindhigu okutegelela embakumbaku limwe, lyi maneko omagumbo agehe taga pululilwa moshikandjohogololo shimwe,” ta popi ngaaka.
Newaka ta ti, oshikandjohogololo oshina omikunda ondhindji, na kehe gumwe okwa hala okupulilwa. “Shoka ohashi ke tu thiminika tuka konge omambakumbaku gopaumwene ngoka gena ondilo, gamwe taga pula N$500/600 mo wili,” ta fatulula ngaaka.
Ta ti, onkundana yomambakumbaku taga ka indjipalekwa miitopolwa, otayi ka lundulula onkalo nonando itaga ka gwana omikunda adhihe, ngaashi ya hala. Pehovelo Nainda gwomomukunda Oshikolongondjo okwa ti, okwi ishangitha okupululilwa kembakumbaku lyepangelo ohaku ya tokitha okulonga omapya gawo ku yele, oshoka omusholondondo gwomadhina ohagu kala omule.
“Epangelo oha li tu pula ombiliha, N$250 mo wili yimwe, moka hatu vulu oku mona ompito yoku pulilitha nando oowili mbali nenge ndatu,” Nainda ta hokolola. Ta gwedha po ta ti, ihe ndyoka lyo paumwene oha li pulula ashike owili yimwe oshoka oshimaliwa oshindji, itaya gwanitha oowili mbali nenge ndatu. Ta ti,omambakumbaku ngoka taga gandjwa ogendji, no ngele oga indjipalekwa nawa, otaga ka yambindhindha oyendji.