OTJIWARONGOS,- Haka ǂâisāhera khoegu, mā-ams ose gere !augu, ge ǂoa ge wekheb di Fraitaxtsēkam ǁgoaga, ǁnāpa gu ǀhaehe rasa !oa Otjipaue !aubǀgurun !garo!ās hîa Kalkfelds !â!âb !nâ ǂnôas ai sâǁaeb ǀkha hâ, hîa ǂnâǂnâsa !aubguru-ǁgan-i ǀkha ǁîgu ai ge hōhe. 

Namibiab ǀAwa!namn ǀHûs (NamPol) di Otjozondjupa ǀKharib !nâ, ǀhûhâsib ǁhōn ǀkha a !nao-aisa Inspekter Maureen Mbehas ge ǂhôamāǂui-i !nâ ǂoa ge wekheb di Fraitaxtsēs ai ge mî, nē ǂâisāhe ra khoegu di kurin ǀgamdisi (20), ǀgamdisihakaǀa (24) !nonadisikoroǀa (35) tsî korodisiǀgamǀa (52) kurina !khōǂgā hâsa. ǁÎgu ge !khōsis !nâ ge ūhe tsî mā-ams ose !aubǀguruna !aus ǀkha ge !nuri!gâhe.

“Nē ǂâisāhera khoegu ge ǀhaehe rasa !oa ǀgae-e gu Otjipauhe !garo!ās ai ǂāhâse ge ǀhao-ūhe. ǁKhāti noxopa ra ǀhaehes ge ǀgam !goaren, xai-i tsî ǀgae-i tsîna gu ge Ondombo !Garo!ās ais tsîna a !ausa. Nē !aubgurun di ǁkhāsib ge ǀhaob ai N$116 000 ai ra ǀnōhe,” tis ge Mbehasa ge mî. 

Nē khoegu ge ǀui daragu ǀkha nē !aubǀguruna !nui tsî gere !khō. ǁÎgu ge ǁari go ǂnôa i Mantaxtsēs ai Otjiwarongos ǁNâu!gâ!khaib ai!â nî ǂhaise go ī i. ǀAwa!namn ôa!nâdi ge noxopa ra ai!gû. -Nampa