Iimbuluma yekwatokoonkondo lyaakiintu naanona mOshitipolwa shaMusati oya indjipala noonkondo.
Okuza muJanuali gwomumvo nguka sigo olopota yohela, opolisi moshitopolwa oya lopotelwa iipotha yomakwatokoonkondo ge li 107, niihakanwa oyindji yiimbuluma mbika aanona aashona.
Omugandji gwomauyelele gwopololisi moshitopolwa shaMusati Anna Kunga okwa yelitha kutya omwaalu ngoka ogonuumvo, okuza ashike muJanuali sigo omasiku 14 gaDesemba.
“Otatu kumagidha aavali, opo ya itule mo mokusila oshimpwiyu aanona, unene ethimbo ndika lyaDesemba, omagumbo ogu udha aantu, omanga aakuluntu taya thigi aanona kaaye li metonatelo lya gwana,’’ ta popi ngaaka.
Ta ti, oshigwana oshi ipyakadhila, oshi na omadhiladhilo omawinayi, ihe otaye ga ningile aanona aashona.
Ta popi kutya otaya lopotelwa omakwatokoonkondo taga ningilwa aanona kaaye shi kutya iihulo oshike, shoka tashi yonagula omadhiladhilo gaanona oshowo onakuyiwa yawo.
“Aavali naya longe aanona kombinga yokulongelwa iilonga inaayi uka, naya tseye uuna omuntu ta kambadhala oku mu longela omiyonena, opo ya vule okupopya oshowo oku shi lopota,’’ ta kumagidha ngaaka.
Ta ti, oyendji oye li momagumbo taya hepekwa, yo yamwe oya tila okupopya oshoka oya mbandamekwa.
Kunga okwa li a kumagidha ngaaka konima ya li ya lopotelwa okanona komimvo heyali anuwa ka kwatwa koonkondo komulumentu gwomimvo 24.
Oshiningwanima shoka osha holoka momukunda Omikwiyu moshikandjohogololo Onesi mehuliloshiwike.
Omulumentu ngoka omumwayinagona nokanona hoka a kwata koonkondo.
Nakufekelwa okwa mangwa po kopolisi. Omugandji gomauyelele mUuministeli wuukashikekookantu Lukas Haufiku sho a li a pulwa a tye ko sha komakwatonkonga, okwa li a fatulula kutya omakwatokoonkondo ohaga holoka nomatompelo ga yooloka, sha ikolela kwaamboka haya longo iilonga mbyoka yi nyanyalaleka, shoka sha kwatela mo ongeyo, elongitho lyoonkondo pambambo oshowo mboka yu uvite taya vulu okulongela aantu shoka ya hala.
Ta ti, shoka otashi vulu okushonopala nenge okuhula po uuna oshigwana tashi tsikile okulongwa nokufatululilwa kombinga yuuthemba washo, nokutseya shoka ye na okuninga uuna ya longelwa omiyonena dholudhi ndoka.
“Oshigwana nashi holole kutya omakwatokoonkondo oshinima kaashi li mondjila pomahala agehe, kutya okiilonga nenge omomagumbo,” ta fatulula ngaaka.
Oshigwana nashi hulithe po okutala ko omakwatokoonkondo ongoshinima osho shi na okukala, oshowo okugandja oombedhi kwaamboka ya ningilwa omiyonena.
Ta fatulula kutya ngele gumwe ha ningilwa omahepeko ngoka oto vulu oku mu dhimbulula momayihumbato ge, onkalo oshowo eholokopo lye uuna te ya pokati kaantu.
Ta ti, ngoka e na uundhigu wu li ngaaka ihe ota nyengwa okuthika koosasiona dhopolisi na dhenge konomola 106 nenge 611 oshali shamuhongi.
-vkaapanda@nepc.com.na