OSHAKATI - Omolwosikola ndjoka tayi tameke oshiwike tashi ya, aavali oyendji otaya mbombolokele koositola tadhi landitha iikwathitholongo, noshowo omizalo dhosikola.
Poositola odhindji otapu monika omikweyo omileeleka dhaavali taya landele oyana oompumbwe dhosikola.
Ositola yoWaltons mOshakati ndjoka ya talika ko oyo yi na iilongithomwa oyindji yosikola, Omandaaha okwa li ya kalelwa kehwata lyaavali pomweelo nayamwe ya kuutumba pondje oshoka omukweyo omule, taya ti oya loloka.
Sonia Iyambo ngoka a li a yi moonkudathana nomutoolinkundana nguka okwa ti oositola adhihe tadhi landitha iilongithomwa yosikola odhu udha mOshakati, na kaye na nkene.
“Nonando natu ye koositola dhimwe, okuudha ashike, kashi ivule,” ta popi ngaaka.
Sho kwa li a pulwa kutya oshike inaaya landa nale pehuulilo lyomumvo, okwa ti, oha mono ashike oshimaliwa omwedhi ngele gwa si, mbyoka a li e na po oyo a longitha okutyapula okili.
John Shivute naye a li momukweyo moka okwa ti, okwa kala momukweyo owili netata, ta nyenyeta ta ti, aaniilonga otaya ende kashona.
“Okulanda ethimbo ndika hako uupyakadhi, ngele iinima omo yi li moositola, aaniilonga naya longe ashike ya itula mo, nenge oositola nadhi kute aaniilonga yopakathimbo ya yakule pethimbo ndika,’’ ta popi ngaaka.
Maria Nekwaya a za komukunda Omuthitu Gwonyama okwa ti, okuuvite nayi oshoka ota longitha oshimaliwa oshindji, okuya kondoolopa oshoka iinima mbyoka tayi pulwa koosikola kayi ko koositola dhi li popepi onkene oku na okuya koWaltons.
“Oosikola otadhi pula iinima oyindji unene, otayi tumonitha iihuna. Ngaye ihandi longo ihe okavenisa kandje tandi mono mokapana kandje okuuka ashike minima yosikola,” ta nyenyeta ngaaka.
Ta ti, kashi ivule osikola yi kale hayi futwa, oshoka paife epangelo olye tu tenteke ashike uundhigu.
“Paife ohatu longitha oshimaliwa oshindji unene shi vulithe nale, sho aanona kwali haya pewa omambo koosikola,” Nekwaya ta popi ngaaka.
Ta gwedha po ta ti, oosikola ndhepangelo paife kadhi ivule naandhoka dhopaumwene, odha ninga ondilo.
“Epangelo nali ete po elunduluko,” ta indile. “Onde ya po nale mpaka, paife onda ninga po owili, ihe ine mona natango ekwatho. Ositola oyu udha unene,” omuvali gumwe ta ti gaaka.
Ta gwedha po ta ti, ositola ndjika otuna okuyi kalela oshoka oyo yina iilongitho oyindji ya nyolwa momusholondondo gwa tumwa alongwa koosikola, oshowo oondando dhayo odhishi okwiindhindhimikilwa.
Kundana sho kwali a ningi omapekapeko moositola ndhimwe hadhi landitha iinima yoosikola, ngaashi Pep, Shoprite, Jet, Game nandho okwali ndhi na omikweyo omileeleka.
vkaapanda@nepc.com.na