OSHAKATI - Ofamili yomulumenhu a fya molwokulika keembwa oya taalela eshongo loshimaliwa shomalongekido epako.
Ovakwapata vonakufya Ruben Abraham weedula 44, otava ti fiyo opapa Omuchina mwene weembwa odo da lya Abraham ina popya navo ngeenge ota yambidida oshivilopako shaye ile ahowe.
Ndateelela Nghipandulwa okwa ti ova taalela eshongo loshimaliwa shokuninga omalongekido oshivilopako shaAbraham omolwoupyakadi woshimaliwa.
“Opolifi inai hala tu popye nOmuchina. Ongodi yOmuchina inatu i pewa molwaashi vati ohatu kala tu mu piyaaneke,” Nghipandulwa ta ti.
Abraham okwa xulifa Omaandaxa koshipangelo shaShakati konima eshi a ponokelwa keembwa nhano pongeshefa yomukwashiwana waChina Huang Lingyan i li mOshakati.
Okwa lopotwa yoo vali omulumenhu umwe naye a ponokelwa keembwa tuu odo Omaandaxa efimbo longula.
Okwa mona epango koshipangelo shaShakati.
Lopokati opo, eembwa adishe oda dipawa kovanambele va dja kouministeli wounamapya, edu netulululo lomadu.
Lingyan okwa patululilwa oshibofa ashike fiyo opapa ina kwatwa po.
Omupedu Commissioner wopolifi mOshana noku li ta kwafele onga omukulunhu wopolifi mOshana, Theophilus Kamati okwa yelifa Lingyan ita kwatwa po manga molwaashi opolifi oye li pyakidila nokuninga omakonakono.
“Ope na omilandu dina okulandulwa tete manga omunhu ina kwatwa po nonande a patululilwa oshibofa,” ta ti.
Okwa ti opolifi kai na mo sha ngeenge Lingyan ota yambidida oshivilopako shaAbraham ile ahawe.
Onghee okwa ti elalakano lopolifi okuninga omakonakono.
Nghipandulwa okwa ti ka shili payuuki eshi Lingyan ina kwatwa po molwashi okwa dopa okutonatela eembwa daye.
“Ngeno okwa li omulaule ngeno osho okwa kwatwa po nale. Otwa hala Lyngyan a kwatwa po diva,” ta ti.
Okwa ti Abraham okwa fiya po ounona vaye vavali ashike paife kape na vali ou te va yambidida.
“Paife ohatu lipula kutya Lyngyan ota faduka po aye koshilongo shavo,” ta ti.
Lopokati opo, Kamati okwa nyamukula ta ti ovapolifi ohava i kofitola yaLyngyan opo a ka talike ngeenge omo tu e li mOshakati.
Nghipandulwa okwa ti omudo 2018 ove na omulumenhu womukwapata wavo a xulifa eshi kwa li a lungilwa meshina lokulunga omunoko kodoolopa yaHenties Bay.
“Okwa li ha longele ehangano lOvachina ashike Ovachina ova faduka po. Fiyo onena kape na eshi sha ningwa po,” ta ti.
Elelo lodoolopa yaShakati ola kunghilila ovakwashiwana opo va tonatele eembwa davo nokukwashipaleka kutya eembwa davo oda vendwa.