ONGWEDIVA-Omupresidente Hage Gottfried Geingob okwa delelwa modoolopa Grootfontein momudo 3 Auguste1941 mOtjiwarongo. Okwa xulifa neudo momafiku 4 Febluali 2024 mepupi lomido 82. Momudo 1948 okwa tameka ofikola yopetameko mOtavi mo omo a putukila.
Omudo 1958 okwa ka twikile elihongo laye koshiputudilo shopombada shoAgustineum moWindhoek mo omo a shivila opolitika. Geingob okwa mana ofikola momudo 1961 noya koTsumeb a ka longa ofikola, noilonga ei okwe i tameka pambelewa momudo 1962. Omudo 1962 omo tuu Geingob a ninga oshilyo shongudu tai pangela yoSwapo pambelewa. Omudo 1964 momafiku 3 Apiilili okwa ya koAmerica opo ka twikile elihongo laye koshiputudilo shoTemple.
Pefimbo e li koAmerica Geingob okwa ulikwa a ninge omukaleliposhilongo woSwapo kongongahangano younyuni, oUnite Nation.
Eedjapo doulongelwe waGeingob
Geingob okwe li hongela odjapo youlongifikola, odjapo yoDegree younapolitika koshiputudilo shoFordha koAmerica momudo 1970.
Omudo 1974 okwa mona odjapo yonghatu yoMasters yoipambele yokondje yoshilongo nomakwatafano opaiwana omanga momudo 2004 okwa mona onghatu yoPhDs koshiputudilo Leeds koUnited Kingdom (UK).
Okwa li a pewa yoo vali eedjapo da yooloka dokutumbalekwa koiputudilo ya yoooloka ngaashi Fordhama koAmerica.
Konima yemanguluko
Geingob oye kwa li wotete okuninga omuprimaminista waNamibia momudo 1990 fiyo 2002, momudo 2012 fiyo 2015 okwa ninga natango omuprimaminista lwoshikando oshitivali. Omudo 2015 okwa ninga Omupresidente omutitatu waNamibia, nomudo 2019 Geingob okwa hoololwa natango lwoshikando oshitivali a ninge Omupresidente fiyo ta xulifile koshipundi.
Geingo okwa hangika ashike e na ko oule wodula okumanako oshikako shaye shokulela ongaa Omupresidente.
Pokati komudo 2008 fiyo 2012 okwa li minista womangeshefelo omo kala ta dana onghandangala ya kula okuhambula po oshikondo shomangeshefelo moshilongo.
Geingob okwa wilika onga Omupresidente wongudu yoSwapo okudja momudo 2017 fiyo ta xulifa.
Komutumba woSwapo wa li ko momudo 2007 Geingob okwa ulika a ninge omupedu Presidente wongudu yoSwapo.
Ounghundi
Momudo 2013, Geingob okwa li a ninolwa etando lomouluvi, omudo oo tuu oo, okwa li a popwa kutya okwa xupa kokaankera. Omudo wadjako okwa li a tandwa komutima, ashike nande ongaho omupresidente okwa kala ta monika eli moukolele muwa.
Neudo Geingob okwa ya koshipangelo koAmerica konima eshi a monika omukifi wokaangela opo a ka mone epango lopaunamiti.
Koshilongo America okwa kala ko ashike oule woshivike shimwe nokonima okwa alukila moshilongo.
Geingob okwa fikila auka koshipangelo shopaumwene shoLady Pohamba nokuxulifa efimbo loufiku.
Ohombo nofamili
Momudo 1967-1992 okwa kala a hombola Priscilla ‘Anty Patty’ Geingos. Okwa li yoo a hombola meme Loini Kandume ashike ohombo yavo ova teka momudo 2008. Omudo 2015 momafiku 14 Febuluali, Geingob okwa hombola Monica Kalondo ou paife a ufanwa “Meme Geingos”. Okwa fiya po ounona vahetatu novamwainamati.
Ovanamibia va tanga Geingob
Oshiwana, ovaleli veendondo da yooloka ova tanga Geingob onga omulumenhu kwa li e na ombili nokuhole oshiwana shaye.
Geingob okwa kala alushe e hole okuminika ovanhu ngeenge e li poshivilo shonumba unene ngeenge a ya kopale ketanga.
Omalelo opamifyuululwakalo a yooloka okwa tanga Geingob onga omulumenhu ehe na kwa li okatongo ile oukwamuhoko.
Ovakulupe novanhu ve na oulema ova tanga Geingob tava ti oye umwe wotete a wedela oshimaliwa shavo shopendjela okudja eeN$600 fiyo eeN$1300.
Geingob okwa fudikwa Osoondaxa komaendo omapendafula oHeroes’Acre moWindhoek.