ONGWEDIVA - Omukulunhu wopolifi moshitukulwa shaHangwena Commissioner Ottilie Kashuupulwa okwa pula omahangano ovakeleli vomaliko va longele kumwe nopolifi mokulwifa oimbuluma.
Okwa ti oimbuluma otai lwifwa noupu moshitukulwa ngeenge omahangano ovakeleli vomaliko tava longele kumwe nopolifi tashi pitile mokukaleka po eameno loshiwana.
Edi Kashuupulwa okwe di popya Etivali komutumba oo kwa li a ninga nomahangano a yooloka ovakeleli vomaliko wa li mEenhana peembelewa da kula dopolifi.
Elalakano lomutumba okutopolelafana omayele nouyelele nghene opolifi tai ka longela kumwe novakeleli vomaliko noshoyo okushivafana.
Kashuupulwa okwa ulikwa a ninge omukulunhu wopolifi moshitukulwa shaHangwena momwedi Aguste neudo.
Okwa kumaida ovakeleli vomaliko opo va longe noudinini mokulwifwa oimbuluma unene tuu keenhele deembaanga molwaashi okwa didilikwa ovanhu va ninga oihakanwa yokutulwa mokatoo.
“Ovakeleli vomaliko noshiwana nashi lopotele opolifi pefimbo kombinga yoimbuluma tai ningwa momidingonoko davo,” ta ti.
Kashuupulwa okwa li yoo vali a yandja ehongo kovakeleli vomaliko nghene ve na okulonga ngeenge va umbata oimaliwa ihapu opo ku kelelwe vaha ninge oihakanwa yokunyekwa oimaliwa meetuwa davo.
“Ohandi ka ninga yoo vali omutumba novakulunhu veembaanga moshitukulwa opo tu kundafane kombinga yeameno loshiwana ngeenge tashi nane oshimaliwa shihapu,” ta ti.
Lopokati opo, Kashuupulwa okwa kumaida oshiwana momikunda opo shi kale tashi lopota oibofa yomakwatonghonga pefimbo shaashi otashi kwafele opolifi i kale ya ninga omakonakono noupu.