ONGWEDIVA - Omalelo goondoolopa moshitopolwa shaShana otaga ka gongala okugalikana oshowo okudhimbulukwa omupresidente omutitu gwoshilongo, Hage Geingob, moondoolopa dhawo.
Omalelo goondoolopa oga li ga tseyitha ngaaka konima omupresidente omupe gwoshilongo Nangolo Mbumba, a li atseyitha kutya oshilongo ashihe nashi dhimbulukwe omupresidente kwa li, okuza momasiku 05, sigo esiku ta ka fumvikwa.
Elelo lyondoolopa lyOngwediva, olya indile aakalimo yOmongwediva opo ya gongale nena okuza po17:30, pehala hali ningilwa omauliko giipindi, Ongwediva Trade Fair.
“Omagalikano getu otaga ka kwatelwa komeho komunyanyo. Omunyanyo gumwe otagu tameke okuza pomatungo gelelo lyondoolopa mOngwediva omanga gamwe taga tameke okuza posikola yoshiputudhilo shopombanda Hifikepunye Pohamba,’’ ya tseyitha ngaaka.
Mayola gwelelo lyondoolopa yaNgwediva Tarah Shalyefu okwa ti ota dhimbulukwa omupresidente kwa li ongomuleli omwaanawa ngoka a longo nuudhiginini okuhumitha komeho oshilongo shika.
Elelo lyondoolopa yaNdangwa nalyo otali ka dhimbulukilwa pamwe naakalimo yalyo eso lyomupresidente Geingob.
Oondoolopa dha yooloka moshilongo okuza koombinga noombinga odha kala nokugongala okuza esiku lyotango omupresidente a hulitha.
Minista gwomauyelele Peya Mushelenga Osoondaha okwa li a pititha onkundana kutya omanga oshilongo shi li moshikogo oshiluudhe, tashi lili onkoshi sho yatsu ongolo, omapandela goshilongo naga kale taga tsilikwa etata sigo ta fumvikwa.
“Omalongekidho oge li metifa, nomasiku gefumbikwa otaga ka tseyithwa,’’ Mushelenga ta ti ngaaka.
Ta tseyitha kutya omupresidente Mbumba okwa tseyitha kutya, mekwatelokomeho lyomupilima minista Saara Kuugongelwa -Amadhila, okwa totwa okomitiye ndjoka tayi longekidha efumbiko.
“Uuna okomitiye ndjoka ya mana nomalongekidho agehe, otayi ka ninga omatseyitho,’’ ta popi ngaaka.
Mushelenga okwa indile oshigwana shi hulithepo okutaambathana omauyelele gaashi gashili kombinga yomalongekidho gefumbiko lyomupresidente, ihe naya tegelele okomitiye ndjoka yi tseyithe.
Omupresidente okwa si Osoondaha ya zi ko, momasiku sho ga li 04, moshipangelo shoLady Pohamba moWindhoek.
Okwa thigi ko aanona osho wo omukulukandhi gwe. -vkaapanda@nepc.com.na