Omaumbo 153 e li molukanda Omahenene modoolopa yaNdangwa otaa ka pewa olusheno.

Edi oda kolekwa komupopiliko welelo laNdangwa Petrina Shitalangaho-Mutikisha momukandapitifi.

Okwa ti kolukanda Omahenene otaku ka tulwa eengodi dolusheno di li 300 notadi ka andjakanekwa nomaumbo okuyandjaneka olusheno.

Mutikisha okwa yelifa kutya oprogalama ei yokuandjaneka olusheno oya futilwa kouministeli woikwamina neenghono neandjaneko eli otali ka ningwa koNored.

“Olusheno okwa li li na okukala la tamekwa okuyandjanekwa momudo 2020\2021 ashike ola ka kalekwa manga molwonghalo yombuto yoCovid-19,” ta ti.

Onghee okwa ti oilonga yokuyandjaneka olusheno oya tameka nale komaumbo amwepo.

Mutikisha okwa hokolola ta ti ovakalimo vokolukanda Omahenene ova shivifilwa nale kelelo laNdangwa kutya otava ka pewa olusheno konima eshi kwa li va ningilwa omutumba kumuni.

“Eumbo keshe ola pewa omukanda wa dja kumuni tau yandje ouyelele kutya eumbo ola pewa epitikilo okutulwa olusheno. Onghee okwa ti omunhu keshe na kwashipaleke kutya oku na omukanda waye pefimbo tau pulwa kovanailonga vaNored,” ta ti.

Okwa kumaida oshiwana opo shi longele kumwe novanailonga tava ka andjaneka olusheno opo va longe noupu.

Lwopokati opo, Mutikisha okwa ti olukanda Omahenene olo limwe la didilikwa lakula mOndangwa noli na omwaalu muhapu wovanhu ve na oyuuyemo i li pedu.

Onghee okwa ti olusheno eli otali ka eta ouwa koshiwana noshoyo okulela oimbuluma molwaashi molukanda otamu ka kala mwa tema paife omanga tava ka longifa olusheno okuninga oinyangadalwa yavo yeengeshefa.

Okwa ti muni waNdangwa ota lalakanene okuyandjaneka omayakulo opashiwana kovakalimo molwaashi osha fimana ngeenge oshiwana shi na omayakulo ngaashi omeva, oundjuwo nolusheno.

-fhamalwa@nepc.com.na