Opolisi yaNamibia moshitopolwa shaShana onkene tayi tsikile nokutaalela omashongo gompumbwe yiiyenditho yi vule okuthika hoka ya pumbiwa mbala. 

Shika osha etitha kakukutu gwopolisi moshitopolwa moka, komufala Naftal Lungameni Sakaria opo a gandje oshitukutuku she shopambelewa shi longithwe uuna pwaa na iiyenditho ya gwana. Sakaria shika okwa li e shi popi moonkundathana noshikundaneki shoNampa mEtitatu, ta ti aanambelewa oya pumbwa okukala nuukwashili sho taya longo noshigwana, ngele kape na iiyenditho oya pumbwa okupopya oshili, peha lyaantu taya popi kutya aapolisi itaya gwanitha po iilonga yawo.

Sha ikolelela kuSakaria, oshitopolwa shaShana oshi na ashike konyala iiyenditho ihetatu mbyoka tayi ende, oshoka oyindji oyi li omutumba molwuunima uushona wa teka.

“Ngele kape na iiyenditho lombwelii ndje, ngele kandi na sho tandi ningi nenge kaandi li miigongi nena oshiyenditho shandje otashi vulu okulongithwa okuya kiipotha ya lopotwa,” ta ti ngaaka.

Okwa dhenge omuthindo kutya oya pumbwa okwiinyenga ngele oya hala okuilwitha iimbuluma moshitopolwa, naashika osha pumbwa eyambidhidho lyaanangeshefa osho wo aantu ayehe okukwathela etanga lyopolisi. Sakaria okwa ti iiyenditho yopolisi moshitopolwa Oshana oya li ye yi pewa momumvo 2015 lwahugunina, nookilometa dhiiyenditho mbyoka odha konda po500 000km.

“Shika osha hala okutya iiyenditho mbika oya kulupa, nonando owu pangele nena, muule woshiwike oya teka nale oshoka ohayi tondoka oowili 24,” ta fatulula ngaaka.
Sakaria okwa li a pupula kombunda omunangeshefa gwokOniipa, Johannes Sakaria gwehangano JSN Automotive Group, ngoka mEtitatu a li a gandja omagano goshitukutuku kopolisi yaNdangwa shoka a li a pangele ongoshitopolwa shokuyambidhidha opolisi mokukandeka iimbuluma.

Johannes okwa li a ulike kutya ohauto ndjoka okwa li ya kotha N$17 000.

“Kashi shi efano ewanawa okumona aanambelewa yopolisi taya hingi iiyenditho yi li monkalo ombwiinayi, unene tuu ngele open a shoka tashi vulu okuningwa po,” ta ti ngaaka. -Nampa