Omukwashiwana waChina vati okwa nyekwa oshimaliwa shoN$150 000 ku walye pefimbo kwa li aka tala oimaliwa kofitola.

Oshiningwanima eshi osha ningwa Etivali pefimbo lomatango mOshakati.

Omupopiliko wopolifi moshitukulwa shaShana Warrant Frieda okwa hokolola ti omulumenhu ou efiku olo okwa li tava kufa oimaliwa keefitola da yooloka nelalakano lokuitwala kombaanga.

Otaku hokololwa kutya manga nakuninga oshihakanwa e li pyakadila noku pata ekutu loimaliwa komesho yofikola, omufekelwa okwa ya motuwa yaye nokukufa mo oshimaliwa.

Vati kalyamupombo ou tete okwa denga ekende lotuwa ashike ina tatuka nokonima okwa patulula omuvelo wotuwa shaashi ka kwa li wa pata. Omufekelwa okwa faduka po onghee fiyo opapa oshimaliwa ina shi monika. Opolifi oya ti ka pena ouyelele kombinga yomufekelwa ou.

Oshiwana otashi kumaidwa opo shi kale alushe tashi shivifile opolifi ngeenge sha umbata oshimaliwa shihapu opo opolifi i kale alushe ya ninga omalongekido okufindikila ovanhu va umbata oshimaliwa shihapu.

Omudo wa djako omukulunhu wopolifi moshitukulwa shaShana, Commissioner Naftal Sakaria okwa tula po eudako lokulongela kumwe neembanga opo di kale tadi dengele opolifi ngeenge pena omunhu tanane oshimaliwa shihapu.

Elalakano opo kukelelwe ovanhu vaha ninge oihakanwa yokunyekwa oshimaliwa shavo unene tuu ovakulupe ovo ve li mopendjela havanane oshimaliwa shihapu. fhamalwa@nepc.com.na