ONGWEDIVA – Omukiintu gwomimvo 33 okwa li a kumwa sho a uvu kutya omushiinda she gwoomvula 50 kutya okwa ningila okamwana osho wo uukadhona ulwe uyali omiyonena dhopaihulo. Oshiningwanima shika osha holoka mOmashaka gaKamanya mOndangwa mOsoondaha nosha thigi oyendji ya kumwa noonkondo.
Okwa li a hokolola kutya oonakuningwa iihakanwa oye na oomvula 11, omugoyi naangoka omushuushuka e na oomvula hetatu.
Warrant Frieda Shikole gwopolisi yaShana okwa koleke kutya omufekelwa okwa mangelwe po mOsoondaha komatango, noshipotha osha patululwa. Edhina lyomufekelwa ngoka e li omukwiita metanga lyegameno itali vulu manga okuthamunwa omolwa uupopepi pokati ke naakwanezimo yaanona.
“Omufekelwa okwa holoka mompangu nombooloha okwe yi tindilwa. Oshipotha osha undulilwa komasiku 3 Januali 2024,” Shikole ta ti ngaaka.
“Mboka yomimvo hetatu nomugoyi, okwa kala noku ya ningila omiyonena okutameka muAguste iikando ya yoolokathana. Okwa li e na ekwatathathano lyopaihulo nokakadhona haka longo mondingosho yahekulu guunona muJuli, nokakadhona hoka omathimbo nomathimbo ohaka lele uunona uuna hekulu kee po,” osho yina yanakuningilwa omuyonena a popi ngaaka, inaa hala edhina lye lyi tumbulwe. Okwa ti okanona ke komimvo 11, omufekelwa okwe ka ningile omuyonena gwopaihulo komatango gOsoondaha ya za ko oshikando shotango.
“Okwa li a dhengele ndje ta ti okamwandje naka ka tale ombiila yandje pondingosho puye, sho ka pewa ombiila, okwa tokola e ka thindikile kegumbo. Okwa lombwele okanona kutya oku ka hole nokwa tameke te ka kwata komagundji, nokwa li a kambadhala oku ka hupita noku ka kwata puukiintu. Ondi na elago sho omunona a lombwele ndje esiku olyo tuu ndyoka,” ta popi ngaaka a sa uunye. Okwa gwedha po kutya esiku olyo tuu ndyoka lyOsoondaha ongula nokomatango, omufekelwa okwa li a longele uunona womimvo hetatu nomugoyi omuyonena gwopaihulo.
“Okanona hoka komimvo omugoyi okwa li a kala nokudhana omagundji gako sigo ga tameke okweehama, nomOsoondaha ongula, okwa li ishewe a ka guma ngoka gwomimvo hetatu. Okwa li a tula omunwe gwe mokadholo ke,” omukulukadhi ta hokolola ngaaka. Ta ti omufekelwa okwa kala nokuheka aanona pamukalo gwoku ya pa oshimaliwa ye ta ti inaya lombwela nando olye. Uusiku mboka tse naashiinda shandje otwa li twa ka hokololitha omulumentu ngoka ashike ombedhi okwe yi tula momalovu. “Otwa dhengele opolisi ee ta mangwa po,” omukulukadhi ta ti ngaaka. Yinakulu guunona uyali okwa li a popi kutya oshiningwanima shika oshe mu ehama noonkondo noshe mu yematitha.
“Kanda li momudhingoloko sho omulumentu nguka a pulwaapulwa, onda li kOvenduka. Okwa kala nokuningila aatekulu yandje omiyonena dhopaihulo ethimbo nuule nasigo onena oshidhigu okutaamba ko, omolwashike omulumentu omunene e na okuniongila aanona aashona ngaaka? Aashona unene,” osho omukulupe a ti ngaaka nomutima gwa ziyalala. Okwa ti olundji sho aanona taya ningilwa omiyonena ye ke po oshoka oha endaenda unene. “Oku na epuko lyasha, ota ehama shapo,” ta ti ngaaka.