ONAMULONGA - Omunafikola womulumenhu okwa fiwa pomutenya konima eshi onduda yaye ya pya po aishe.

Oshiningwanima osha ningwa oshivike sha djako momukunda Onamulonga moshitukulwa shaShikoto efimbo lomutenya.

Eino Johannes weedula 19 okwa hokolola ta ti onduda yaye oya pya po konima eshi eengodi dolusheno datokoka fiyo tashi eta omundilo.

Johannes okwa ti omaliko maye ayeshe okwa pila monduda mwa kwatelwa oikwafifo yaye yofikola.

“Onda hangika ashike opo da di kofikola koNIMT koArandis molwashi otwa pewa okafudo,” Johannes ta ti.

Okwa ti pefimbo loshiponga ina hangika mo meumbo onghee okwa ka dengelwa ongodi kovaneumbo vaye kutya obashu yaye oya tema.

“Okudja opo eshi nda fika meumbo onda hanga nale onduda aishe ya haka omundilo,” ta hokolola.

Johannes ou e li momudo wotete te li hongele omalusheno okwa ti ngeenge okwa shuna kofikola ita kala vali e na oikwafifo noshoyo oidjalomwa molwashi oinima yaye aishe oya pila monduda.

“Ovadali vange ihava longo onghee otava xupu noudjuu okuyambididange,” ta ti.

Okwa ti oku na ehalo lokushuna kofikola opo a dule okumana elihongo laye nelalakano okuninga omunashilonga nokuyambidida ofamili yaye.

Johannes otai indile moshiwana opo shi mu yambidide noidjlomwa noshimaliwa opo a dule okulanda oikwafifo yaye yofikola. Kwau e na ehalo lokuyambidida Johannes nakwatafane naye kongodi yaye 0816151554 ile konomola yongodi yameme waye 0812743316.

fhamalwa@nepc.com.na