ONGWEDIVA - Omunafikola weedula 21 ota indile moshiwana shi mu yambidide nokatemba koshinanena.
Wilhelmina Kashima ote lihongo koshiputudilo sho-IUM modula onhivali koWindhoek te lihongele eifano loBusiness Management.
Kashima okwa ti okwa delwa noulema ashike eshi itashi mu teya omukumo wokuhanga ondjodi yaye yokumana elihongo laye.
“Otashi tu nge yoo vali omukumo wokulihonga nondjungu ngeenge nda mona okatemba koshinanena,” ta ti.
Okwa hokolola ta ti oku na okaoko kamwe, ye ke na omaulu onghee paife iha dulu vali okuundula okatemba nokaoko kamwe shaashi oha kala ke ne eenghono.
“Omafimbo amwe ihandi dulu okushanga molwaashi okaoko ohaka kala ka loloka okuundula okatemba komalola,” ta ti.
Omunafikola ou okwa hokolola ta ti okatemba kakapu okulongifa komunhu e na okaoko kamwe molwaashi ombinga imwe yomalola kape na ou te i undula.
“Alushe ohandi laata ngeenge handi i keetundi shaashi okatemba oka enda kashona,” ta ti.
Okwa weda po ta ti ngeenge okwa mona okatemba taka longo kokashina kolusheno otashi kala shipu kuye okufika kofikola pefimbo noshoyo okushinga nokaoko kamwe.
Kashima ota monika kongodi yaye yopeke yo0816771780 kwau e na ehalo loku mu yambidida.