ONDANGWA -Omunailonga koradio yoShipi FM Patrick Kemanye naye osho a kufwa moilonga komuhona waye Martin Shipanga Omaandaxa.
Kemanye ou a kala ha lesha eenghundana koradio yoShipi FM okwa lombwela Kundana ta ti okwa shangelwa omukunda kuShipanga efimbo lomutenya nokulombwela kutya ine uya vali koilonga mefiku la landula ko.
“Onda hangika ndi li koilonga konima yotundi 14h00 eshi nda mana okulesha eenghundana. Okwa ti efiku olo nandi lixule mo moilonga,” ta ti.
Mopaife ngaha ovanailonga vavali ova kufwa moilonga omo oshivike sha dja ko Gustav Sheehama a shiivika nawa Gee naye a kufwa moilonga. Gee okwa ti okwa kufwa moilonga konima eshi a pula Shipanga opo e va pe omauwa oilonga ngaashi opendjela noshoyo ewedelo leedjabi.
Oshivike sha dja ko ovanailonga vamwe po voradio, okwa li va fikama komesho yetungo loShipi FM tava pula Gee a shune moilonga shaashi vati okwa kufwa moilonga shihe li pauyuuki.
Shipanga okwa pitifa omukanda oshivike sha dja ko ta ti kutya Gee ina kufwa moilonga molwaashi kwa li ta pula ewedelo leedjabi ashike okwa kufwa she likwatelela kokatendo nomilandu da tulwa po kouministeli woilonga. “Onde mu kufa ashike moilonga molwaashi onda hala okushunifa pedu omwaalu wovanailonga vange, ngaashi naanaa ovanhu shito hava kufwa moilonga,” ta ti.
Kundana okwa ninga eenghendabala dokudengela Shipanga noshoyo okutuma omatumwalaka opo a tye ko sha kombinga yoshikumungu shekufo moilonga laKemanya, ashike ongodi yaye oya dima.
Lopokati opo, Kemanye naGee ova ti Shipanga ota popi oipupulu momukanda waye ou a pitifa.
“Otwa kufwa moilonga shihe li pauyuuki,” tava ti.
Omupopiliko wouministeli oilonga Maria Hedimbi okwa ti Kemanye naGee nava kwatafane nombelewa youministeli woilonga mOndangwa opo va dule okuyandja eenyenyeto lavo.