Kansela woshikandjhoololo shaNgwediva Andreas Utoni okwa ti ondjila yaKatana –Onamutai otai longwa paife konima eshi ovakalimo vopomudingonoko opo va kala tava mono oixuna keendjila hadi talama omeva.

Kansela okwa ti ombelewa yaye oya kala nokulopotela oshikondo sheendjila shoRoads Authority kombinga yomhumbwe yeendjila moshikandjohoololo shaye, nopaife ondjila ei ikale oya tamekwa okulongwa.

Pefimbo a ninga eenghundafana naKundana Omaandaxa kansela okwa ti ombelewa yaye otai lalakanene oku yandja omayakulo koshiwana ngaashi omeva nokukala a kandula po omukundu womhumbwe yeendjila momikunda.

Utoni okwa kunghulila omikunda ngaashi Okatope, Ounonge, Omatando, Omupanda, Ohambungu opo di longele kumwe novanhu tava longo ondjila.

Okwa ti ovakwashiwana nava xulife po okukala tava va ke po oilongifo nokukala yoo tava kufa po outenda va dikwa mopate kovanailonga wokulonga ondjila shaashi eshi otashi shunifa oilonga yondjila monima.

Okwa ti pefimbo londjila tai longwa ovanamikunda vopomudingonoko opo otava ka pewa eemhito doilonga da yooloka dokukala tava longo ondjila.

Kansela okwa ti ondjila tai longwa otai ka yandja ouwa kovakalimo, kovanafikola nokovahongifikola shaashi  itava ka kala vali tava ende momeva ngeenge eendjila da talama.

Okwa ti  pefimbo lodula eefikola noupangelo vopomudingonoko opo ohau kala wapata shaashi ondjila ohai kala ihadi omeva.

Andreas okwa ti ondjila ei otai ka yandja omhito kovakalimo vokoshitukulwa shaHangwena opo va kale tave u ya noupu mOshana tava longifa ei ondjila ngeenge  ya pu okulonga.

Okwa weda po ta ti ombelewa yaye oya tula moilonga eepoloyeka dihapu tadi ka longwa moshikandjohoololo shaNgwediva opo oshiwana shi kale sha mona omayakulo elixwapo.

– fahamalwa@nepc.com.na