Omunambelewa omukulunhu wouhaku moshitukulwa shaShikoto Joshua Nghipangelwa okwa ti ovanaudu novanailonga koshipangelo shaMuthiya itava ka longa vali noudjuu ngeenge omeva a pata molwaashi paife ova tungilwa otenga yomeva.

Nghipangelwa okwa ti elalakano lotenga yomeva okulongifa ngeenge omeva a pata molwaashi okwa didilikwa ovanhu va kala tava mono oixuna ngeenge omeva a pata modoolopa.

Edi Nghipangelwa okwe di popya meenghundafana a ninga naKundana mEtivali. Okwa hokolola ta ti otenga oya tungwa yakula ya wana okukwafela oshipangelo oule womafiku avali.

Ovanailonga vouhaku koshipangelo oko ova li hava nyenyeta onghalo yoshipangelo tava ti ohava ningi oule womafiku vehe na omeva.

Kokanyofi kokupulumunina ohaku kala alushe ku na eshongo linene molwaashi ohaku pumbwa omeva efimbo keshe.

Umwe womupangi okwa hokolola ta ti okwa pandula ombelewa yomukulunhuwiliki eshi ya kandula po omukundu ou shaashi paife otava ka longa noupu.

 “Moshipangelo ohamu kala ashike mwa kaka tamu nyika edimba tali di moundjuwo. Ovanaudu noshoyo ovanailonga kakwa li hatu longifa vali oundjuwo molwaashi kape na omeva,” ta ti.

Ovapangi okwa li yoo hava twaalele omeva koshipangelo opo va dule okuyandja omiti kovanaudu.

Nghipangelwa okwa ti ombelewa yaye otai twikile nokukandula po omashongo a taalelwa koipangelo noshoyo koupangelona momikunda.

Onghee okwa ti osha fimana ngeenge omashongo koipangelo taa kandulwa po opo ovanailonga vouhaku va longe noupu.

fhamalwa@nepc.com.na

Enota okekaku... Omunambelewakulunhu wouhaku mOshikoto Joshua Nghipangelwa.

Efano: Otwe li pewa