Omunamido 32 Jonh Nghishihange, voo vamwe tava ti Johh Spazza okwa ti oshitalendi shaye shokwiimba poshe mu yeululila omivelo doilonga.
Odalele yaShakati moshitulukulwa shaShana, oya hokolola kutya oya kala i hole okuimba omaimbilo opamhepo, novadali vaye ova pangela opo ve mu kongele omudeuli wokaxumba oshoyo oshiketala.
Okwa ti eshi a pewa edeulo inashi mu pula oule wefimbo a shiive shaashi vati oshitalendi shoushikingalo mumwe nouxumba oshoyo oiketala osha li mohonde.
“Konima eshi nda pewa edeulo onda ka tameka okukala handi shiki okaxumba kongeleka nonda ka pyokoka lela. Eshi nda mona kutya onda shiiva lela, onda ka longa eendenge dange mbali Jonas naJoe okushika okaxumba, shaashi navo ova bumunwa kwaame eshi nda kala handi shi denge,” Nghishihange ta ti.
Okwa ti yee ina ya kokule noiputudilo yopombada shaashi okwa kala a tula eengalo komesho onghee mumwaina Shacks Mwandingi okwe mu lombwela a pitife oalubuma yaye yotete.
Mo2020 oalbuma oyo“Forward we go” osho ve i pitifa voo naMwandingi noya li ya mona ovanhu vahapu ve i panda. Vati ove ke lihanga tava landifa oucd ve li 500 moule woivike itatu, opo Nghishihange a dja a shiivika nawa nedina leengalo daye onga Jonh Spazza.
“Edina Spazza onde li lukwa keefelende dange pefimbo nda li handi lihongo okushika oshiketala. Okwa li ndi hole okutya kandi shi shi okushika ohandi spazza ashike. Eshi nda ka shiiva mepakumo leisho, oshipweela onde ke ininga edina lange osho,” Nghishihange ta hokola.
Nghishihange okwa twikila ta ti molwoshitalendi shaye okwe lihanga ta longele oMilitary brass band ongomwiimbi, omushiki woiketala oshoyo wouxumba.
Okwa ti yoo oshitalendi shaye oshe mu kufa koxulo yeonga shaashi vati oshe mu pa oilonga i li nawa mepangelo, unene tuu eshi ina dula okuya kokule noiputudilo yopombada.
“Ohandi vatela ofamili yange keshe apa hai dulu oshoyo ame mwene. Ondi na yoo omadilaadilo okulonga mo natango okaalbuma kashona ngeenge efimbo ole shi pitike,” Nghishihange ta ti.
Okwa ti yoo ota kumaida aveshe ovo va dililka oitalendi muvo vaha sholole ndele nava pule komesho, shaashi otai dulu oku va twala kokule.