ONGWEDIVA - Atyioge Anthony okwa ti okwa ile koIndonesia oko a mona oukuloni vedina Indomie noodles hava telekwa ashike ominute di li nhatu, ndele ta kongo ondungedilaaladilo e va ete koNamibia opo Ovanamibia ve litalele ko.

Anthony okwa ti eshi she mu undula opo a ete po ediladilo loludi eli osheshi kutya, okwa didilika nghee ovanashilonga vahapu ihava kala ve na efimbo lokulitelekela nokwe shi ninga opo ovanhu ava va dule okukala hava i koilonga va makela.

Okwa twikila kutya vahapu ohava kala ashike va tala moukulya vanafangwa vokongolo, oyo ihe na eevatamine da wana noya nyikila oukolele wavo oshiponga. 

Antony okwa ti okwa mona yoo nghee Ovaamerica ve litula mokulya okukoloni ava, nohava landwa neenghono molweevatamine damatutu edi ve na. 

Okwa twikila kutya nasho oshe mu undula yoo e uye e va lolife Ovanamibia. 

“Onda didilika yoo kutya Ovaindonesia ohava longifa oihemba yavo ihapu yopaushitwe ngeenge tava longekida oukoloni ava, oyo ihe na nande oupyakadi washa komalutu ovanhu, nohava dulu lela okuya komesho,” Antony ta ti.

Okwa twikila kutya yee okuudite yoo etumba lakula mokutumbula kutya oukoloni voIndomie mopaife ovo hava landwa meendelelo moNamibia. 

Okwati paife oye ha fi oshisho kutya eefitola ngaashi Shoprite, Woermann Brock oshoyo Pick ‘nPay nadikwao dihapu alushe odi na ostoka ya wana shaashi otashi ende nawa neenghono.

“Oukoloni ava natango ove holike kovanafikola vahapu shaashi ohaa ndjeneke ashike omeva, tava tula mo oukoloni vavo ndele tava li,” Antony ta weda po.

Okwa ti yoo omashongo aa va taalele omafiyafano ngaashi eefitola edi hadi landifa oukoloni vomaludi amwe onoodles, ashike nande onghao voo vati otava pula ashike komesho nokukala votete mokulandifa oukoloni ava shaashi ove holike kovanhu sha pitilila.