OMUTAKU - Ovanafikola kofikola Emilia Shimweefeleni Combined otava ka tungilwa eengulufikola 12 noshoyo okupewa olusheno noikwafifohongo.
Edi oda popiwa kuminista wehongo Anna Nghipondoka pefimbo a talela po ofikola Emilia Shimweefeleni oshivike sha dja ko.
Ofikola Emilia Shimweefeleni Combined oi li momukunda Omutaku nope na ovanafikola 500 mwa kwatelwa ovanafikola ovakwashiwana Ovaangola.
Nghipondoka okwa talela po yoo vali eefikola da yooloka moshitukulwa shaHangwena mwa kwatelwa eembelewa dehongo lopashitukulwa tadi tungwa mEenhana.
Okwa didilikwa ovanafikola pofikola opo va taalela omashongo eengulu dokuhongela noshoyo olusheno, mwa kwatelewa oipundi noitaafula.
Ovanafikola vamwe ohava kala koshipundi ve li ko vavali molwaashi oipundi inai wana.
Ovanafikola ohava hongelwa momatala a tungwa noipeleki.
Minista okwa ti ovanafikola pofikola opo itava ka hongelwa vali moipeleki onghee otava ka tungilwa eengulufikola 12.
Okwa ti momudo 2025 eengulufikola otadi kala da pwa okutunga nofikola ei otai ka kala i na fiyo ondodo onhi-9.
“Ouministeli wetu otau lalakanene okukandula po omashongo a taalelwa kovanafikola molwaashi osha fimana kovanafikola opo ve lihonge noupu nokupita noitwa iwa,” Nghipondoka ta ti.
Minista okwa ti ouministeli wavo owa taalela eshongo linene lomwaalu wovanafikola tau ende wa uka pombada onghee naashi osha eta ovanafikola ve lifinaneke meengulu.
Okwa yelifa ta ti ouministeli wehongo paife owa tunga eengulufikola 510 onghee otau twikile okukala wa tunga natango eengulufikola 500 keefikola da yooloka moshilongo.
Nghipondoka okwa kumaida ovanafikola ve lihonge noudinini nokufimaneka ovahongifikola vavo.
Eramus Mwaandange oku li oshilyo shelelonongelo pofikola opo, okwa pandula epangelo eshi tali tungile ovanafikola eengulu dokuhongela.
Okwa ti ovanafikola ohava mono oixuna pefimbo lodula ngeenge tava hongelwa moipeleki molwaashi oha mu talama omeva nokupepwa po komhepo.
Onghee okwa ti eengulufikola otadi ka eta olunduluko lakula pofikola opo nosho yo okutwa ovanafikola omukumo ve lihonge.