OHANGWENA - Omupopiliko wopolifi moshitukulwa shaHangwena Sergeant Andreas Nghiyolwa okwa ti ovanhu onghee tava twikile nokuninga oihakanwa yokutulwa mokatoo nokukanifa omaliko avo.
Okwa ti meemwedi mbali da pita opolifi oya lopotelwa oshimaliwa shi dulife N$600 000 sha kufwa oshiwana konima eshi va tulwa mokatoo.
Edi Nghiyolwa okwe di popya Etivali pefimbo va ninga eenghundafana naKundana eshi a hokolola ta ti ovanafikola novakulupe opo va pendjelwa ovo unene va ninga oihakanwa okutulwa mokatoo.
Nghiyolwa okwa yelifa ta ti ovakulupe ohava tulwa mokatoo tava lombwelwa opo va tume oshimaliwa shonhumba vo va pewe omikanda dokushinga.
“Ovakulupe ohava ka konga omikanda dokushinga koNatis yaHelao Nafidi ashike ohava shakeneke ko nookalyamupombo tave va lombwele oipupulu kutya omukanda wokushingna ohau landwa kombilixa,” ta ti.
Okwa ti ovanafikola koshiputudilo sha-NUST kEenhana navo ova ninga oihakanwa yokutulwa mokatoo eshi hava ufanwa opo va ka tolokele ovalumenhu veembudi, tave liningifa kutya ihava udu Oshiwambo.
“Omunafikola oha lombwelwa opo a fiye po ondjato yaye mu na okompiuta, nokudja opo ovalumenhu ohava faduka po,” ta ti.
Okwa weda po ta ti ovanhu vamwe ohava kengelelwa oshimaliwa shavo keengodi dopeke. Nghiyolwa okwa kumaida oshiwana unene tuu ovanafikola novakulupe opo va haye vali momakwatafano novanhu vehe va shi.
“Xulifei po okupopya novanhu muhe vashi ngeenge mu li meedoolopa.
Kape na omunhu ha landifa omukanda wokushinga ashike ohua kongwa keembelwa doNatis,” ta ti.
fhamalwa@nepc.com.na