Ovanafikola vokofikola Onambutu combined School ova dika eumbo lopamufyululwakalo lili meni lofikola hali longifwa kovanafikola ongaa oshitukulwa shoshilongwa shavo sheenghedi dopamifyululwakalo.
Ofikola oya kala nokuyandja eetundi kovanafikola moshilongwa shopamifyululwakalo wOshiwambo.
Elalakano loshilongwa eshi okulonga ounona vofikola opo va kale ve na eudeko leenghedi dOshiwambo, nokukala va longwa kombinga nghee oihemba hai dulu okupange omikifi da yooloka.
Meumbo omwa tungwa eenduda doshiwambo da yooloka ngaashi onduda yoshakalwa, elimba loifini, onduda yomudimbi nosho tuu enduda dihapu dOshiwambo. Meenghundafana a ninga naKundana omukulunhufikola pofikola Onambutu Ester Mbango okwa hokolola ta ti oshilongwa sheenghedi domifyuululwakalo osha totwa po kominista ikulu yehongo nakufya Dr Abrahama Iyambo momudo 2011 eshi a kala nokuxwaxwameka eefikola domOhangwena di kale tadi longo ovanafikola oshilongwa sheenghedi domifyuululwakalo.
Mbango okwa ti eumbo otali kala tali longifwa kovanafikola ngeenge tava ningi oinyangadalwa yavo yopamufyuulukalo ngaashi okuyenga ondjove, okutwa oilya, oku teleka oshingali nosho tuu oinyangadalwa ikwao ya yooloka.
Okwa ti ovanafikola ohava longwa konima yeetundi efiku keshe shaashi efimbo longula ohava kala tava ningi oilongwa yavo imwe po.
Okwa hokolola ta ti oshilongwa eshi ihashi shangwa omakonakono shaashi ouministeli welongo inau yandja epitikilo loshilongwa shi kale tashi shangwa, ashike ovanafikola ohava shange oinyangadalwa kombinga yoshilongwa.
“Ohandi indile ouministeli wehongo opo u pitike ovanafikola va kale tava shange omakonakono oshilongwa sheenghedi dopamufyuululwakalo opo oidjemo yavo ikale tai tulwa peendjapo dovanafikola,” Mbango ta ti.
Okwa ti oshilongwa eshi osha lundulula omalihumbato ovanafikola shaashi ovanafikola ohava kala tava longwa kombinga yefimano louteku.
Mbango okwa ti ovanhu aveshe mwa kwatelwa ovaleli, ovanafikola okudja keefikola da yooloka ile ovapashiyoni ova manguluka okukala veu ya okutalela po eumbo eli.
Okwa holokola ta ti pofikola opena omuhandjo wovanafikola hava nangala moubashu opo va kale hava di popepi nofikola.“Ovanafikola ova longifa oshini shili meumbo eshi ohava kala tava tu oilya opo va dule okumona oufila wokulya nokukala tava henge ondjove yokutula koshivelelwa shavo,” Mbango ta ti.
Mbango okwa yelifa ta ti ofikola yaye oye imwe yadidilikwa hai shi endifa nawa kexulilo lomudo eshi ina ounona hava piti noidjemo iwa.
Okwa weda po ta ti ovahongifikola keefikola, ovadali nava kale tava longo ounona kombinga yefimano leenghedi dopamufyuululwakalo opo ovanafikola va kale vaxwaxwamekwa okukala vena ohokwe neudo lomufyuululwakalo.
Ofikola Onambutu oina ondodo okudja pokinda fiyo onhi-11, ovanafikola 486 novahongifikola 21.