OKANKALO - Omukulunhuwikili wehongo moshitukulwa shaShikoto Aletta Eises okwa kumaida ovanafikola opo va xulife po okukaka ve li komalungula molwaashi otashi mane po efimbo lavo lokulihonga noshoyo okupukifwa.
Edi Eises okwe di popya pefimbo lokuyandja omapapa kovanafikola noshoyo kovahongifikola oshivike sha dja ko kosekundofikola Onguti Secondary School moshikandjohoololo shaKankolo.
Efiku olo ovanafikola novahongifikola va longa nawa okwa li va pewa omapapa eenghatu da yooloka.
“Ovanafikola vahapu omu li ashike komalungula ngaashi koFacebook noTwitter noshoyo Instagram osho shi li sha nyika oshiponga molwaashi otashi eta oidjemo yedopo,” ta ti.
Okwa kumaida yoo vali ovadali opo navo va tonatele ounona vavo vaha ye vali komapandja okomalungula shaashi ohaku kala ku na oinima tai pukifa ovanafikola.
Eises okwa ti oshitukulwa shaye osha shuna pedu moidjemo yondodo onhi-12 omudo wa dja ko, shi li ponomola onhiheyali.
Okwa hokolola ta ti omudo 2022 oshitukulwa shaShikoto okwa li sha pita nawa shi li pomola onhine onghee okwa kumaida ovahongifikola opo va longe noudiinini nokukwashilipaleka kutya Oshikoto otashi piti novanafikola vahapu.
Eises okwa ti osha fimana ngeenge omunafikola a longwa opo a dule okuninga omunashilonga momaifano a yooloka ile omuleli wokomongula.
Lwopokati opo, kansela woshikandjohoololo shaKankolo Hans Nambodi okwa kumaida ovadali opo va longele kumwe novahongifikola okuyambidida elihongo lovanafikola.
“Osha fimana ngeenge ovahongifikola novakulunhufikola tava longele kumwe novadali okukundafana nghene ovanafikola ve na okuyambididwa va pite noidjemo iwa,” ta ti.