Yomuhulu wa litolongo mwa naha Zambia Fredrick Chilukutu ulumbile Kamaiso ya Tolongo Ya Windoko, nalumbile sihulu mapantiti moba pilela ni babeleki ba litolongo, hamoho cwalo ni milelo yebelekiswa kukutiseza mapantiti mwa mayemo amande. Chilukutu ni bana zamaya ni bona neba potezi tolongo yetuna mwanaha Lamubulo, hala poto ya hae ya viki mukatumbi. Muzamaisi ya sweli situlo sesi swana mwanaha Namibia, Raphael Hamunyela namusupelize likezo ni lituto ze ezahala kwatolongo.

“Halupotela libaka mokubelekelwa, neluboni kuli kuna ni lituto zeñata ze ezahala mi neli nitabisize. Mapantiti babazwa mwa litolongo za naha Namibia bafumana zebaswanela kufumana, mi lukolwiswa kuli haluna kuba ni mapantiti ba ba ta kutela kufosa kakuli habazwa bayofumana za kueza,” nekubulezi Chilukutu mwangambolo ni Nampa.

Yomuhulu wa litolongo wanaha Zambia natabisizwe hape kisilikani se sinde mwahala babeleki ba tolongo ni mapantiti. 

“Silikani sesili mwahala mapantiti ni babeleki ki sesinde, mi nihupula kuli lutokwa kalulo yeo. Kakuba babeleki ba kwa litolongo banaha Zambia, lubata kubulela kuli lutabezi zeluboni. Nelu tabezi hamoho cwalo kubona mobapila mapantiti; kwa kena. Nikolwa kuli buntu bwa tabelwa. Luinga cwalo – kona mokuswanela kubela molutalimela batu babaswana ni luna,’’ nabulezi.

Kamaiso ya litolongo ya naha Namibia ni Zambia nebile ni mukopano mwa Windoko kuambola moba ka belekela hamoho. 

Mulelo kikubona kuli ki mapantiti bafi mwa linaha zepeli ba bana ni takazo yakufeleleza lilimo zabona zakupika mwalinaha moba simuluha.

- Nampa