ONGENGA – Minista womidingonoko, ovatalelipo nomakuti Pohamba Shifeta okwa kumaida oshiwana po shi ha nwe omalodu ngeenge tashi ka hoolola molwashi omunhu ota dulu okupukifa ngeenge ta hoolola.
“Ngeenge omunhu ta ka hoolola a nwa omalodu ota dulu okudimbwa kutya ota ka hoolola Swapo,” ta ti.
Edi Shifeta okwe di popya Olomakaya pefimbo loshikonga shoSwapo sha li kOngenga moshitukulwa shaHangwena.
Ovayambididi woSwapo, ounona mwa kwatelwa omupilima minista Saara Kuugongelwa-Amadhila okwa li va holoka momwaalu muhapu koshikonga.
Eengudu dopopalitika da yooloka ode li pyakidila okuninga oikonga yomahoololo nokuxwaxwameka oshiwana shi hoolole ovaleli vavo.
Neudo ota kukala omahoololo Oupresidente noilyo yomutumba wopashiwana momafiku 27 Novomba.
Shifeta okwa ti ovanhu vamwe ohava i keenhele dokuhoololela va kolwa eshi ha kala tava piyaneke ovanambelewa ile itave li ufa komilandu da tulwa po.
“Omunhu umwe oto hange a kolwa e li konhele yokuhoololela ta lombwela ovanhu kutya ota ka hoolola ongudu i li pi. Natu li umbateni nawa mefiku lokuhoolola,” ta ti.
Okwa lombwela oshiwana opo shi ha pwilikine keengudu domilamenho molwashi oha di popi oipupulu.
“Ina mu hekwa vali keengudu domilamenho. Ka vena apa tava hange oimaliwa molwashi navo ova pumbwa oshimaliwa,” ta ti. Okwa weda po ta ti Swapo oyo ashike ongudu tai dulu okuyambidida oshiwana molwashi oina oshimaliwa.
Shifeta okwa ti eengudu domilamenho dimwe oda dopa okutula po eelandufano komalelo eedoolopa.
“Oveleli veengudu domilamenho oko ve li komalelo eedoolopa oko tava dundakanifa oshiwana. Itava dulu okulela oshilongo molwashi itava dulu okutula po oukumwe nommbili moshiwana,” ta ti.
Shifeta okwa kumaida oshiwana opo shi kwate nawa oukalata vavo vokuhoolola shaashi otava dulu okuholekwa po kovapambele vavo ovo ve li keengudu domilamenho.
Omupilima minista Saara Kuugongelwa-Amadhila okwa lombwela oshiwana ta ti Netumbo Nandi-Ndaitwah oye ashike omunhu ta dulu okulela oshilongo.