Hamushangandjayi wongeleka Reformed Evangelical Anglican Church of Namibia (REACH), Lazarus Hakwaake okwa kumaida oshiwana opo shiha lye ombelela yeengobe 100 vati da dipawa kovanhu veitavelo laIslam ongexwikiloyambo.
Umwe womovakulunhu ovanaitavelo lOvamuslema monooli Zaheer Brenner okwa ti elalakano lokutoma eengobe odo okuyambidida ovanhu ve li momhumbwe oikulya. Brenner okwa ti oshi li oshinakuwanifa shehangano lavo okuyambidida oshiwana momidingonoko da yooloka.
Okwa ti ehangano e li ola dja koshilongo Turkey noha li yambidida oilongo ya yooloka mounyuni.
Eengobe odo vati otadi dipawa medimbuluko lexwikiloyambo la ningilwe komuprofeti Abraham oo a li a tokola oku ninga omona Ismael exwikiloyambo. Oshinima eshi ohashi ningwa moshivilo shedina Eid, nohashi danwa kovaitaveli Ovamuslema.
Brenner okwa yelifa kutya okuyandja ombelela ei oku li oshinakuwanifa shehangano lavo loShare the Care, olo le limanga kumwe noDiyanet Foundation yokoTurkey oyo hai yambidida oiwana ya yooloka mounyuni.
Ashike Hakwaake okwa ti okulya ombelela oyo oshinima sha nyika oshiponga molwaasho “Ovamuslema otava longifa exwikiloyambo.”
Okwa fatulula ta ti exwikiloyambo okwa li hali yandjwa nale kuKalunga opo ovanhu va diminwe po omatimba.
Hakwaake okwa ti ovakwanaluhepo paife ova ninga oihakanwa yokulongifwa moinima ya puka.
“Kandi li omhinge yovanhu tava yambidida oshiwana ngeenge shi li moluhepo ashike ondi li omhinge nomukalo wa longifwa,” ta ti.
“Ovamuslema ova yandja eengobe nelalakano opo va diminw epo omatimba avo. Sha hala kutya ovanhu otava li ombelela ya dipawa nelalakano lokuninga exwikiloyambo ledimepo lomatimba,” Hakwaake ta fatulula.
“Otu omukalo wokulikoshela ovanhu. Kashi li mondjila,” ta ti.
Okwa kumaida ovaleli vaNamibia opo va yambule po nokutota po eeporongalama odo tadi kwafele oshiwana shi li moluhepo moshili.
Oshiwana shovaMuslema osha yandja eengobe 100 koitukulwa itano nelalakano lokuyandja ombelela kovanhu ve li momhumbwe yoikulya.
Eengobe oda dipawa Osoondaxa modoolopa yEenhana omo kwa li oshiwana sha dja koikandjohoololo ya yooloka sha ngudumana okupewa ombelela.
Ombelela otai ka yandjwa koitukulwa ngaashi Ohangwena, Omusati, Kunene, Oshana noyaKavango.
Ngoloneya moshitukulwa shaHangwena Sebastian Ndeitunga okwa kumaida ookansela tava wilike oikandjohoololo opo va kwashipaleke kutya ombelela otai topolelwa ovanhu ve li momhumbwe yoikulya.
“Inandi hala okuuda kombinga yombelela ya landifwa po ile ya pewa ovanhu inava nuninwa okupewa ombelela ei. Natu kaleni tu na olukeno lokuyambidida ovanhu ve li moluhepo,” ta ti.
Ndeitunga neudo okwa yelifa ta ti neudo okwa li ku na oshikukuta osho sha eta ovanhu vahapu va dengwe kondjala. Okwa weda po ta ti oimuna nayo oya ninga oihakanwa yokudengwa koshikukuta.
Okwa ti ombelela ei oye uya pefimbo liwa molwaashi oshiwana osha pumbwa oikulya unene oshiwana shovayelele.
Ngoloneya okwa pandula oshiwana shovaMuslema molwokuyambidida oitukulwa nombelela.
-fhamalwa@nepc.com.na