Elelo lyondoolopa yaNdangwa olya kumagidha oshigwana shi hulithe po okulya oohi tadhi kwatwa metale lyohanya.

Okwa ndhindhilikwa oshigwana sha mbonyona ekuma ndyoka lya ndhingilila etale lyohanya mOndangwa, nelalakano omeya gapanyke mo yo ya vule okukwata oohi.

Omukuluntuwiliki melelo lyondoolopa lyOndangwa Ismael Namgongo okwa ti, okuteya po ekuma lyondama yohanya okwa e ta uupyakandhi sho omeya ngoka ga mbomboloka mo noku yelula omagumbo ogendji mondoolopa.

“Omeya gonyata oga yi sigo omomagumbo gaantu. 

Nonando shoka sha holoka onkalo ngashingeyi oyi li nawa sho elelolyondoolopa lya katuka onkatu, noku opaleka onkalo,’’ ta fatulula ngaaka.

Ta gwedha ko kutya, nonando uupyakandhi mboka owa ningi ethimbo e le, oyeli metifa oku wu kandula po sho taya thaneke okuya po nondama onene ndyoka tayi kala tayi kungulukile ohanya.

“Ondama ndyoka otayi tu pula oshimaliwa shathika koomiliona N$200. Omolwa oshimaiwa inaashi gwana, otwa ningi eyindilo kuuministeli weyambulepo lyoondolopa opo wutu yambidhidhe,” ta ti ngaaka.

Omugandji gwomauyelele melelo lyondoolopa ndjoka Petrina Shitalangaho-Mutikisha okwa gandja ombili peha lyelelolyondoolopa kaakalimo mboka ya adhika komeya gonyata.

“Kashi shi oshiningilawina, ombili. Ota tu opaleke mpoka pwakakekwa,” ta gandja ombili.

Shitalangaho-Mutikisha okwa indile oshigwana shi hulihe po okukwata oohi tadhi zi monyata oshoka oshanika oshiponga.

Ta ti, oshigwana na shi hulithe po wo okuteya po noku hanagula po omatungo na kehe shoka sha tulwa po kelelo lyondoolopa.“Uupyakadhi mboka ohau holoka omumvo kehe, ihe ohau etwa koshigwana. Shoka ka shili nando omondjila, ohashi tula elelolyondoolopa muupyakandhi woku longulula noku longitha oshimaliwa oshindji,” ta nyenyeta ngaaka.

Ta gwedha ko kutya oshigwana otashi shunitha elelo lyondoolopa monima, omanga lyi na okuhumakomeho.

-vkaapanda@nepc.com.na