ONGWEDIVA – Ohamba yOvakwanyama Martha Mwadinhomo yaKristian Nelumbu okwa lombwela oshiwana opo shi xulife po okupitila eengula dinene keendingosho pefimbo leendima.

Okwa ti eli olo efimbo liwa nokulonga nelitulemo momapya.

“Ovanhu vamwe ova tameka nale okulima omwedi wa dja ko. Otashi ulike efano liwa notashi xwaxwameke oshiwana shi kufe ko oshihopaenenwa eshi,” ta ti.

Okwa ti oovene vomikunda nava kale tava talele po eendingosho efimbo longula nelalakano lokutala ovanhu va patulula eekamba. “Omunhu a patulula ondingosho efimbo longula na lopotwe ndele edina laye tali shangwa,” ta ti.

Okwa popya ta ti ombelewa yaye oya lombwela oovene vomikunda opo va kwashilipaleke kutya kape na ondingosho tai patuluka eevili doilonga yomomapya.

“Mwene womukunda okwa pumbwa okuulika oshihopaenenwa shiwa kovanamikunda vaye nokutula po ombili nelandulafano,”  Mwadinomho ta ti.

Okwa kumaida oshiwana monooli opo shi longe nondjungu opo shi dule okumona oipalwifa ya wana momapya.

Mwadinhomo okwa ti neudo oku na omuloka muwa, naashi otashi yandje omukumo kovanhu va longe noudiinini.

“Ovanhu inava kala ashike va teelela okupewa oshikukuta kepangelo. Natu longeni oikulya yetu vene,” ta ti.

Mwadinhomo okwa popya ta ti neudo ina hala okuuda moshitunda shaUkwanyama tashi lopotwa oimbuluma.

“Oimbuluma itai ulike efano liwa moshiwana. Ihandi kala ndi udite ombili  ngeenge ovanhu tava dipayafana nosho yo oikumungu yomakwatonghonga,” ta ti.

Okwa kumaida oshiwana opo shi kale shi na ombili noukumwe momidingonoko davo.

“Ombili oya fimana. Ounona nava te kulilwe outeku noshoyo efimano lomufyuululwakalo neenghulunghedi,” ta ti.