Charles Ndeumane
Omutseyiveta a tseyika nawa ngoka eli wo oshilyo shongundumutima yoSwapo Sisa Namandje okwa ti ke na ehalo lyopoosa yuuleli mepangelo, oku uvite nawa miilonga mbyoka ha longo.
Manga aanapolitika naaleli mongundu yoSwapo taya thigathana po ya hala oopoosa dhuuleli mongundu konima yomahogololo, Namandje ina ulika ohokwe yokumona opoosa yuuleli. Sho a yi moonkundathana noshifokundaneki shika Namandje okwa yelitha omatompelo ge kutya omolwashike itaa wayimine aanapolitika ooyakwao mboka taya kutha iipundi mongundu. “Oomvula 20 dha piti onde shi yelitha nawa kutya inandi hala opoosa yuuleli mepangelo, ondi na ombili nonda hala okutsikila niilonga yandje yuuhahende moshikondo shopaumwene, ashike otandi tsikile oku kala oshilyo shopolitburo yoSwapo,” osho Namandje a ti.
Namandje okwa kala omunandjungu moveta uule woomvula odhindji nokwa talika ko koyendji onga hahende dhingi moshilongo. Okwa ti omitse dhepangelo dha zi ko odha li dhe mu pe oompito dhokulongela epangelo ashike okwa tindi.